العودة   منتدى النرجس > المنتديات الأدبية > منتدى القصص والروايات الاكثر شعبية



إضافة رد
 
LinkBack أدوات الموضوع
قديم 07-08-2018, 09:19 PM   رقم المشاركة : 1
معلومات العضو
وليدالحمداني
إدارة الموقع
 







وليدالحمداني غير متواجد حالياً

 

Questionmark زوجته الثانية ـ بقلم أمل أحمد

زوجته الثانية ـ بقلم أمل أحمد

بقلم_امل_احمد




الجزء الاول+ الثاني+الثالث..... انتهت
(الفصل الاول)
ماما: لك رح تعيش ملكة معو
مروان: اي امي بس هو متزوج
ماما: اي وين المشكلة..وكمان هو حيطلقا
مروان: لك يا امي ما حيطلقا وفرضا بانو طلقا لك عندو منا ولد وبنت وسهى حتنبلى فيهن
ماما: كلن ولدين منا قصة ..وكمان امو اكيد حتساعدا.. ها ليكا اجت سهى
سهى: مرحبا. كيفكن. صاير شي .. اخي ليه هيك وشك شو في
ماما: تعي تعي لاحكيلك
(انا سهى بنت متوسطة الجمال من عيلة ع قد حالا ..ابي متوفي من سنين وامي ست كبيرة بالعمر وصحتا تعبانة واخي مروان هو اخي الوحيد ورفيقي وروحي)
سهى: خير امي شو صاير
ماما: لك يا ضرسانة اجاكي عريس بعمرك ما كنت رح تحلمي فيه
سهى: جد امي
ماما: لك اييييي شب وبيجننن ومن عيلة قد حالا
سهى: اي الحمد لله وهيك بتخلصي مني امي ههههههه
ماما: هههههههههه..تؤبري البي
مروان: اي امي كمليلا عن مواصفاتو لهالرجال
سهى: ما بدي اسمع اكتر اخي ..يلي سمعتو بكفيني
مروان: لا اختي ما بكفي.. الشب متزوج وعندو ولد وبنت
سهى: شو عم تحكو.. لك اااخ لك ليه هيك حضي انا ليه
ماما: لك استني بلا ما تبلشي ندب.. الشب في مشاكل بينو وبين مرتو وبدو يطلقا وولادو امو حتربيهن
مروان: لك اختي انت ع شو مستعجلة.. لك لسا ما كملتي 19 سنة.. لساتك صغيرة وحلوة ومنا مستعجلين عليكي
ماما: اي لاااا انا مستعجلة ..انا مستحيل ضيع ع بنتي هيك فرصة
مروان: لك يا امي....
ماما: هششششش خلصنا.. انا عطيتهن موعد بكرة المسا وقول ان شاء الله تعجبن اختك
مروان: وليه ما رح تعجبن ..ما حيلاقو متلا ولو لفو الدنيي كلا
سهى: لك ربي يسعدك ويخليلي اياك
باسم شب باول عمرو متزوج من خمس سنين ..حياتو كلا كانت مشاكل مع مرتو.. وصلت بيناتن للمحاكم.. وعندو منا ولد وبنت..
اجا تاني نهار واجا وقت جيتن لعنا.. جهزت حالي وامي كانت طاااايرة من الفرح
ماما: ان شاء الله يوافقو عليكي وتكوني من نصيبو يا بنتي
سهى: امي والله قلبي مقبوض وخايفة
ماما: عادي يا روحي كل عروس هيك بتكون بيوم خطبتا
ندق الباب وفتحلن اخي مروان
مروان: اهلا وسهلا تفضلو
باسم: يزبد فضلك
دخلن مروان واستقبلتن امي ..واجت لعندي ركض..
ماما: ييييي شو حلووو.. لك بجنن طول ودقن وشبوبية.. جهزي القهوة وتعي ما تطولي هاا
سهى: حاضر امي
جهزت القهوة وطلعت لعندن.. كانت ست كبيرة شوي بالعمر بس العز والجاه باين عليها.. كتير مرتبة وحكيا موزون.. ومعا بنتا يلي كانت متلا ..بنت عز وجاه.. وباسم يلي التعب باين عليه
ضيفت القهوة وقعدت مقابيلن...
ماما: والله قبل تحكو فيها بيوم كنت عم ادعيلا ربنا يبعت نصيبا وهاي ربنا استجاب الحمد لله.. والله قلتلا متل هالشب والجماعة ما رح تلاقي
انا خجلت كتير من حكي امي وعشوي كنت رح ابكي
حماتي: اي ان شاء الله تكون من نصيبنا
كنت قاعدة معن وحاسة بغصة بقلبي... يمكن حكي امي وتصرفاتا معن هي السبب.. كانت ع شوي ح تقلي لبسي وروحي معن...
بعد بيومين من جيتن لعنا اتصل باسم باخي مروان..
مروان: اهلين يا هلا.. ونحنا بالاكتر والله.. ان شاء الله.. اهلا وسهلا
سكر مروان التلفون وقعد ع الكرسي وبانت عليه علامات الانزعاج...
ماما: خير يامو.. شو في.. مين يلي اتصل
مروان: هاد باسم.. بدن ييجو لعنا المسا لحتى نتفق ع كلشي
ماما: الحمد لله يا ربي
مروان: لك والله حتجننيني امي والله.. لك شو يلي عاجبك فيهن يا امي.. والله قلبي واجعني ع سهى
ماما: اوعااا تحكي قداما هالشي.. اختك فرحانة وبكرة من ورا حكيك بتخرب كلشي
مروان: والله ماني مطمن يا امي
ماما: توكل ع الله يا ابني.. لك بدي اطمن ع اختك قبل ما موت.. بدي امن عليها مع رجال يحميها ويصونها
مروان:...................
رجعت يوما من مدرستي استقبلتني امي وهي طايرة من فرحتا..
ماما: يا روحي يا سهى.. الحمد لله ربنا استجاب لدعواتي... باسم واهلو جايين الليلة ليتفقو مع خيك ع كلشي
سهى: بهالسرعة امي
ماما: لك ايا سرعة هي.. والله هاليومين حسيتون عن سنة كاملة.. ربي يسر امورك يا بنتي ويهنيكي
سهى: امين ويخليلي ياكي يا امي
(الفصل الثاني)
اجا وقت المسا واجا باسم واهلو كلن معو ...
حماتي: لا تقلقي يا بنتي.. ابني باسم ما في منو.. وولادو لا تشيلي همن.. انا بربيهم ..ما رح نحملك مسؤوليتهم
ماما: بنتي سهى ما بترضى.. وولادو لباسم حيكونو ولادها..
انا كنت قاعدة معن ومخنووقة ..حكيون كان يكتم ع انفاسي.. وكنت حاسة حالي رح انخنق وعيوني غرغرو بالدموع..
بنت حماي: شبك سهى..ليه متدايقة.. ما تخافي حبيبتي نحنا كلنا معك
من جهة كنت مبسوطة انو رح اتزوج ومن جهة تانية كان في شي بقلبي مخوفني... يمكن هالاحساس ربنا بيعطينا اياه لنتراجع عن قرارنا.. بس انا ما تراجعت ولا حتى قررت...
تمت خطبتي من باسم.. باسم كان كتير حنون معي ..ما حسسني بانو كان مرتبط من قبلي ابدا.. كلشي كان بدي اياه يلبيلي اياه.. بس يلي صار بانو مرتو لباسم من لما عرفت بانو خطب حاولت ترجعلو.. كان يسهر معا بالساعات كل يوم ع التلفون...
يمكن مو من حقي انو اعترض بس الموضوع كان كتير مدايقني...كنت حس بنار بقلبي كل ما عرفت بانو حاكاها ..
بقي يحاكيها لوقت ما قطعت الامل بانو باسم يتركني ورجعت قاطعتو وما عادت حاكتو..
مشت الخطوبة يلي كانت بس شهرين وتزوجنا..
واول يوم تزوجنا فيه.. كنا لسا بالصباحية..
حماتي: باسم امي.. مرتك ولدت وبدن ياك تروح ع المشفى لتسجل بنتك
باسم: ايمت ولدت
حماتي: مبيرحا بالليل
بصراحة كان الموقف كتير محزن.. مرتو ولدت بالوقت يلي كان هو معي.. كان عقلو وتفكيرو بشي تاني بعيد عنا كتير...
شعرت بتانيب الضمير وحزنت عليها كتير لمرتو..
صارت مشاكل كتيرة بعد ولادتا والولاد كانو ضايعين بين امهن وابوهن..وكل واحد فيهن يجاكر التاني بولادن..
مشت اول فترة بصعوبة كبيرة ع الولاد... وكانو كتير يحزنوو.. بس اموري معن كانت كتير منيحة وكلشي تمام بس بعدا بلش قناع باسم واهلو يختفي..
بلشو يحاسبوني ع اقلا شي.. ع اكل ولادو ع تيابن... ع نومتن ع طلعتن ودخلتن.. يعني انا المسؤولة الوحيدة عنن.. ابوهن ابدا ما كان يتحملن..ووعد ستن راح.. وانا حبيتن من كل قلبي.. وخدمتن بعيوني.. بالرغم من التعب الكبير يلي كنت اتعبو معن..
مشت الايام وهالولاد صارو قطعة من روحي.. وحملت وربنا رزقتني توم صبيان.. تلبكت كتير فيهن ..ما حد رحمني وبلشت مشاكلي مع زوجي وبيت حماي
حماتي: لك انت مانك بشر ..لك هالولاد هدول امانة برقبتك
سهى: والله ما عم لحق يا مرت عمي
باسم: شو يعني ما عم تلحقي.. لك كلن اربع ولاد ما عم تقدري تلبيلن طلباتن
كنا كل يوم والتاني ع نفس الموضوع.. داق خلقي وبلشت اتعب.. صرت ع اقلا كلمة نرفز وعصب.. ما عدت تحملت ولا كلمة لا منو ولا من اهلو.. وبيوم كنا ببيت حماي كالعادة ويوما غلط علي بالكلام عصبت قدامن وما شفتو غير بلش ضرب فيني..
وصار الضرب عندو عادة ..كل ما نرفز شوي وتديق خلاقي من تعب الولاد يبلش ضرب فيني... والادهى والامر من هيك هنن اهلو يلي عم يشدو ع ايدو
ما بعرف كيف مشت الايام معن.. يلي كانت من سيء لاسوأ..
تم طلاقو من مرتو الاولى ومع هيك ما فقد الامل بانو ترجعلو.. بس بيوم وصلو خبر بانو مرتو تزوجت.. صابتو حالة جنوون.. قلب من انسان لوحش ... ما عرف قديش كان يحبا الا بعد ما ضاعت منو.. وكل قهرو ووجعو طلعو فيني.. وكانو عم يحملني المسؤولية بطلاقون وزواجا...
تعبت كتير منو ومن حياتو ومن اهلو.. ما عندن احترام ولا رحمة ..بناتن عندن متل الكتاب المقدس.. بس انا شو؟؟.. انا ولاشي.. انا صفر ..ويمكن اقل من الصفر.. قلة احترامن وحكيون يلي متل السم كان كل يوم عم يزيد اكتر واكتر.. ووصلت معن يعايروني بامي بانو كبتني عليهن.. واهمال باسم لالي عم يزيد يوم عن يوم.. ومسؤولية ولادو عم تهدني.. بحبن كتير بس مسؤوليتن كتير كبيرة...
(الفصل الثالث)
مشت ايام جحيم معو لباسم.. واهلي عم يشوفو ويتحسرو
ماما: انا السبب.. انا يلي رميتك معن.. كنت مفكرتن ناس اكابر وبيفهمو.. وانخدعت فيه لباسم
مروان: الله يسامحك يا امي.. نبهتك كتير وما سمعتي
ماما: (تبكي) سامحيني يا بنتي
سهى: لا تعملي بحالك هيك امي.. هاد قدري ونصيبي
مروان: اي نحنا بنرمي حالنا بالنار وبنقول قدر ونصيب.. ع كلن ما في شي راح.. هلا تعي معي ..تركيلو ولادو لشوف مين بيربيلو اياهن.. تعي انت وولادك.. ببنيلك احلا بيت وبتعيشي ملكة مع ولادك.. تركيه
سهى: ما فيني اخي.. هالولاد امانة برقبتي.. امن تركتن وما في مين يهتم فيهن.... انا ما رح اتركن
مروان: لكن لا تشكيلي بعد هيك.. تحملي اهانتو واهانة اهلو الك
طلع مروان من بيتي وهو معصب وزعلان...
ماما: لا تزعلي منو امي.. هو محروق قلبو عليكي
سهى: ما بزعل منو.. مروان روحي يا امي
مشت سنين والولاد عم يكبرو وهمن يزيد وما في شي تغير غير قلبي ..قلبي يلي انطفا.. طفا باسم بانانيته واهمالو ..ليالي نمت فيها والدموع بعيوني.. ما كان يحس علي.. ولا كان يسال فيني الا وقت ما بدو يفرغ رغبة الحيوانية بس...
قرفتو بكل تفاصيلو.. قرفت جسمو.. قرفت ريحتو ..قرفت اخلاقو.. ما عم اقدر اطلع فيه.. عم شوفو متل الحيوان..
وبيوم اكتشفت بانو عم يحاكي بنت معو بالشغل..
سهى: لك كل يلي متحملتو منك وعم تحب وتتمعشق علي
باسم: اي وانت شو دخلك
سهى: ما دخلني؟ لكن بشو دخلني انا؟
باسم: انت هون بس لتلبي رغباتي انا وتهتمي بولادي.. ووقت ما بمل منك بكبك وبجيب عشرة بدالك
سهى: لك الله يلعنك ويلعن يلي ربوك هيك ترباية
سمعني سبيتو وسبيت اهلو وهجم علي متل التور.. وبلش ضرب فيني كسرلي جسمي كلو..
تاني نهار بعتت لاخي واول ما شافني جن جنانو..
مروان: لك والله لادبحو لهالحيوان.. لك هاد يلي شاطر فيه
سهى: اخي روق شوي.. انا بعتت وراك لتساعدني مو لتقتلو ولتدبحو.. انا ما بدي اتركو فهام هالشي
مروان: لك بعد كل هاد لسا متمسكة فيه
سهى: لك فهمني اخي... لك والله بكرهو وبقرف منو كمان.. بس انا ما بدي اترك ولادو ولا بدي ولادي يتبهدلو
مروان: والله انت غريبة عجيبة.. ربي يصبرني عليكي
بقي اخي عندي لاجى باسم.. واول ما فات باسم وشافو لمروان تغيرت ملامح وشو وبان الارتباك عليه
باسم: هي صهري عنا.. اهلا وسهلا
مروان: انو اهلا وسهلا هاي.. لك انت مانك بشر.. شو يلي عاملة بمرتك
باسم: طول بالك صهري... اختك طويلة لسان.. هي سبتني وسبت اهلي
مروان: اختي ولا مرة بحياتا كلا سبت انسان.. انت يلي احوجتا لهالشي
باسم: هلا هيك صار الحكي
مروان: اي هيك صار... لك ضحكتو عليها وحملتوها مسؤولية ولادك وسكتت.. بهدلتوها وسكتت.. ضربتها قدام اهلك وسكتت ..وبالاخر تحب وتتمعشق عليها.. لك وما بدك تسبك..
تجادلو كتير وشدو بالحكي مع بعضن كتير وانهو الحديث بانو باسم يغير من تصرفاتو معي...
بس الانسان مو بهالسهولة بيقدر يغير من طبيعتو وطينتو ...
ضربو واهانتو كتير خفت بس علاقتو بهالبنت زادت ..ما كان ينام الا وهو يحاكيها.. كنت اسمعو وسكاكين تقطع بقلبي من جوا..الكلام يلي كان يحكيلا اياه ما سمعتو منو غير بفترة خطبتي.. دبحني وانا عايشة.. كنت بالنسبة الو جارية مو اكتر وهي الحب الجديد يلي طلع بحياتو...
بقي ع هالحالة سنتين ومن بعدا..
باسم: سهى جهزيلي طقمي الرسمي
سهى: لوين رايح
باسم: لعند اهلا لرباب.. اليوم رح نقرا الفاتحة
سهى: لك انت عم تحكي جد
باسم: اي جد
سهى: باسم بترجاك لا تعمل فيني هيك.. انا تحملت منك كتير وشفت كتير وبقيت معك وعم ربي ولاد مانن ولادي.. عم بتكافيني بهالطريقة هاي
باسم: لا تتعبي حالك.. الموضوع انتهى
كنت شوفو كل يوم يحاكيها بس كان لسا عندي امل يتركا.. حكالي هالكلمتين وراح.. ما بعرف شو يلي حسيت فيه وقتا.. كانت مشاعر ما بتنوصف.. حزن وكره وخوف.. حزن ع حالي وسنين عمري يلي ضاعت مع شخص ندل متل باسم.. وكره كبير الو ولاهلو ..وخوف من الايام الجاية يلي ما بعرف شو رح يصير فيها...
ما بعرف ازا كنت بستاهل يصير فيني هيك.. ممكن يكون عقاب الي من رب العالمين لانو قبلت اتجوزو ومرتو لسا ع ذمتو.. يمكن كنت انا السبب بطلاقون.. وانا السبب ببعد ولادو عن امن... ضميري عم يانبني كتير.. روحي تعبانة.. وقلبي مات..
حكيتلكن قصتي لارتاح شوي.. بس ابدا ما عم بقدر ارتاح.. تعبانة كتير.. ما بعرف ازا كنتو بمطرحي شو رح تعملو وكيف كان لازم اتصرف من البداية...
حبيت انهيلكن القصة متل ما هي لحتى تقدرو تنصحوها لسهى وتعطوها رايكن بيلي صار معا...
انتهت








   رد مع اقتباس

قديم 08-08-2018, 03:28 PM   رقم المشاركة : 2
معلومات العضو
^كــاتم أســرار^
المدير العام
 






^كــاتم أســرار^ متواجد حالياً

رد: زوجته الثانية ـ بقلم أمل أحمد

شكرا لك والله يعطيك العافية


كاتم أسرار






   رد مع اقتباس

إضافة رد

مواقع النشر (المفضلة)


جديد مواضيع قسم منتدى القصص والروايات الاكثر شعبية
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 01:08 AM.


Powered by vBulletin® Version 3.8.8, Copyright ©2000 - 2019, Jelsoft Enterprises Ltd.
SEO by vBSEO 3.6.0 PL2
المقالات والمواد المنشورة في منتدى النرجس لاتُعبر بالضرورة عن رأي منتدى النرجس ويتحمل صاحب المشاركه كامل المسؤوليه عن اي مخالفه او انتهاك لحقوق الغير