العودة   منتدى النرجس > المنتديات الأدبية > منتدى القصص والروايات الاكثر شعبية



إضافة رد
 
LinkBack أدوات الموضوع
قديم 07-08-2018, 09:41 PM   رقم المشاركة : 1
معلومات العضو
وليدالحمداني
إدارة الموقع
 







وليدالحمداني غير متواجد حالياً

 

Questionmark ملائكة الأرض ـ بقلم أمل أحمد

ملائكة الأرض ـ بقلم أمل أحمد

بقلم_امل_احمد

(الجزء الاول)
بيت كبير.. هادي كتير.. صالة كبيرة مزينة ورود بكل ركن منا ..مطبخ مرتب وريحة النضافة طالعة منو.. غرفة نوم حلوة كتير ..جنب التخت باقة ورد طبيعي ..وفوق هالتخت صبية باول عمرا عم تبكي.. بكا وجع وتعب من هموم كبيرة ع قلبا..
ماهر: اووووووف.. لك خلص حبي ..ما حلك ترضي بنصيبنا.. خلص قتنعي بيلي ربنا كتبو ..هاي انا جنبك ما بكفيكي
ندى: (تبكي) ليه انا من بين كل هالناس ..ليه انا.. لك شوف كلن عندن ولاد.. ليه انا لا
ماهر: استغفر الله.. لك شو هالحكي هاد.. ما بصير يا عمري.. حرام
ندى: والله مشتهية ضم ولد لحضني وشم ريحتو ..الريحة يلي ممزوجة بريحتك وريحتي.. مشتهية شي ولد يقلي امي.. تعبت من هالحال والله
ماهر: يعني انا يلي مو حابب.. بس هاد قدرنا.. هاي سبع سنين ..مو سنة او سنتين.. بكفي تعب ادوية ودكاترة
ماهر وندى.. تنين بحبو بعض او بعشقو بعض.. حبن مميز كتير.. حياتن كلا فرح وضحك وما بيعرفو الزعل ابدا.. تزوجو من سبع سنين.. وسبحانو الله مو كاتبلن يكون عندن ولاد..
ماهر مخبي غصتو بقلبو.. لحتى ما يزيدا ع ندى.. بس ندى مانا قدرانة.. كل يوم والتاني جروحا بتنفتح وبتبلش تبكي من غصة قلبا المخبايي
ندى: بترجاك ماهر تعا معي بس هالمرة هاي.. بترجاك
ماهر: لك معدتي ما عادت تتحمل ادوية.. لك قرفتن.. بعد سبع سنين رح تزبط.. خلص انسي انسي هالموضوع واستسلمي لقدرك
ندى: (تبكي) لك حرام حرام.. ما بصير تعمل فيني هيك ..حرام
ماهر: (معصب) لك شو هو يلي حرام شووووووو.. لك ما تركت دكتور ولا دكتورة يعتبو علي.. من دكتور لدكتور ومن عيادة لعيادة ومن دوا لدوا.. لك كل يلي بطالعو من شغلي بروح ع الادوية ..ولسا بتقولي حرام.. لك انا ع طول عم حاول داريكي .. وما بحب بينلك يلي بقلبي.. فلا تزيديها علي ندى لا تزيديها
طلع ماهر من البيت وسكر الباب بعصبية..
ندى: يا رب.. ما بقيلي غيرك يساعدني ..يا رب
كانت كل مشاكلن بسبب هالموضوع هاد.. قلبت حياتن مناقرات ع طول بسبب الدكاترة والعلاجات... نفسيتن كانت ع طول تعبانة.. مانن قدرانين ينسو الموضوع ...
*بالمسا*
ماهر: مسا الخير
ندى: مسا النور حبيبي.. ممممممم
فتح ماهر الخزانة وعم يطلع بجامتو ليلبسا.. اجت ندى من وراه ولفتو من خصرو..
ندى: لساتك زعلان مني
برم حالو ماهر عليها وضما بكل حب..
ماهر: معقول ازعل من روحي ودنيتي
ندى: ربي ما يحرمني منك
ماهر: رح بدل تيابي.. بتكوني جهزتي سهرة ع كيفك وجهزتي شي فلم رعب نحضرو ..
ندى: ههههههه حاضر حبي
(الجزء الثاني)
كل يوم لندى وماهر كان متل يلي قبلو.. حياتن روتينية.. ماهر بيفيق ع شغلو.. وندى بتعزل بيتا وبتطلع زيارة
ندى: صباح الخير مرت عمي.. صباح الخير سمر
ام ماهر: صباح النور يا بنتي.. تعي يا روحي تعي
سمر: صباح النور حبيبتي
ندى: باينتكن مبسوطين ع الصبح.. صاير شي
ام ماهر: اي والله يا بنتي مبسوطين.. بس القلب مانو قدران يطلعا لهالفرحة
ودمعو عيونا لام ماهر
ندى: خير مرت عمي شو صاير.. وليه هالدموع.. لك وانت كمان سمر.. لك ليه بتبكو شو في
ام ماهر: سمر حامل
الخبر كان متل السكين ع قلبا لندى.. دمعو عيونا.. وركضت لعند سمر.. وضمتا
ندى: لك الف الف مبروك حبيبتي... لك وليه عم تبكو ليه
سمر: الله يبارك فيكي يا عمري.. ربي يعطيكي يا ندى وما يحرمك هالفرحة
صارو دمعوعا ع خدا متل الشلال ..ضمتا حماتا وهي عم تبكي من جوات قلبا..
ام ماهر: ربي يعوض عليكي يا بنتي ويعطيكي ويفرحنا فيكي يا عمري
ندى: انا رح روح اشتري حلو.. لنحلي كل الحارة.. هاد اول حفيد لعيلة ابو ماهر
اشترت حلو وبلشت تحلي كل يلي بتشوفو..كانت عم تتصرف من حرقة قلبا.. وبنفس الوقت فرحت كتير لسلفتا..
طول فترة حملا لسمر كانت ندى يوم يوم تروح لعندا وتعاونا بشغل البيت وما تتركا تتعب بنوب.. واجا يوم ولادتا ما تركتا ابدا.. لحتى ولدت وجابت اول حفيد للعيلة..
الكل كان عم يبكي.. يبكو من فرحتن بحفيدن ويبكو من وجع قلبن ع ندى وماهر..
ابو ماهر: ربي يعطيكن وما يحرمكن هالفرحة
ام ماهر حملت هالولد الصغير وحطتو بحضنا لندى..
ام ماهر: حملي يا عمري
ندى: ما شاء الله.. احمد ..رح سميلكن ياه احمد
هالولد صار متل ابنا لندى ..ما تقدر يمر يوم وما تشوفو.. كل يوم تشتريلو قطعة تياب شكل.. وتاخدو ع بيتا وتحممو وتلبسو..
*بعد شي سنة *
ام ماهر: ماهر امي.. بدي حاكيك بموضوع.. وبرضاي عليك لا ترفض
ماهر: تفضلي امي
ام ماهر: انا من فترة وانا عم صمد شوية مصاري الك
ماهر: الي؟ ولشو امي.. الحمد لله مو محتاجين لشي.. لتكون ندى شكتلك من شي
ام ماهر: لا والله يا امي.. ربي يسعدها لندى بعمرا ما شكت من شي
ماهر: لكن لشو امي
ام ماهر: بدي تسافر انت ومرتك وتحاولو تزرعو زراعة.. والله يا امي مشتهية شوف ولد بحضنا لمرتك
ماهر: امي خلصنا ...بعد ثمن سنين بدو يجينا ولاد.. انا رضيت بنصيبي
ام ماهر: برضاي عليك يا امي.. بس هالمرة ..كرمال ندى يا امي.. والله عم تحرقلي قلبي كل ما شفتا حاملتو لاحمد
دمعو عيونو لماهر...
ماهر: ماشي امي ..ماشي
ندى: مرحبا.. شايفة اجتماع سري هون.. خير مرت عمي شو صاير ههههه
ام ماهر: هاتي لبشارة
ندى: شو صاير
ام ماهر: بكرة رح تسافرو لتزرعو
اطلعو فيها تنيناتن وهني مصدومين..
ماهر: امي.. شو بكرة.. لك لنجهز وراقنا
ام ماهر: ابو ماهر جهزلكن كلشي.. ما عليكن غير تسافرو.. وحجزلكن بالمشفى كمان
ندى: انت شو عم تحكو.. زراعة زراعة.. ما عم صدق والله
ركضت لعند حماتا وضمتا وبوستا
ندى: ربي يسعدك ويخليلنا ياكي
(الجزء الثالث)
تاني نهار جهزو حالن ماهر وندى وودعو بيت حماها وسافرو..
خلال فترة قصيرة كانت الزراعة تامة وامورن تمام
الدكتور: هالفترة ما لازم تتحركي ابدا.. بدك تنامي ع ضهرك لنطمن ع حملك
ماهر: حاضر دكتور
كان ابو ماهر حاجزلن بيت ليسكنو فيه لوقت ما يطمنو ع حملا وتجهز امورن..
ندى: ماهر.. ماني مصدقة.. والله وكاني عم احلم.. لك معقول فيه ببطني روح.. ما عم صدق
حط راسو ماهر ع بطنا..
ماهر: اي بعدي ايدك هيك عن ابني.. مرحبا محمد.. بابا محمد.. بدي اياك تطلع قبضاي.. اي وكمان وانت ببطن الماما لا تقصر ادفسا ادفسا قد ما تقدر
ندى: ههههههههه.. اي بس يمكن تكون بنوتة
ماهر: ااااخ.. لاكلا.. ما عم اقدر اتخيل يكون عندي ولد او بنت
مشو 3 ايام وندى ما عم تتحرك من فراشا ..
كانت الدنيي الصبح.. فاقت لتروح ع الحمام.. اول ما وقفت..
ندى: ماهر.. ماهر
ماهر: خير حبي.. شو صاير
ندى: (تبكي) دم.. دم
ماهر: لا تخافي حبيبتي.. هلا بدق للدكتور
دق ماهر للدكتور ..وقلن يروحو لعندو فورا
الدكتور: بعتزر منكن... ان شاء الله غير مرة.. للاسف الحمل ما تم
ندى ما قدرت تتحمل الصدمة.. ولا ماهر كمان ..ضمو بعضن تنيناتن وبكيوو.. بكيو من وجع قلبن ومن قهرن.. جهزو حالن ورجعو لبلدن مكسورين القلب ..
ام ماهر: لا تزعلو يا امي.. هالمرة ما زبطت.. المرة الجاي بتزبط
ندى: خلص مرت عمي.. ما عاد فيه لا تانية ولا تالتة.. بكفينا تعب ومصاريف.. انا كان لازم اسمع لماهر وسلم لقدري
مشت الايام متل بعضا.. وبعد شي خمس شهور..
ندى: مرت عمي في شي مخوفني كتير
ام ماهر: خير يا بنتي
ندى: صدري عم يوجعني كتير.. وحاسة فيه كتلة
ام ماهر: اعوذ بالله.. شو هالحكي
ندى: اي والله يا مرت عمي.. باينتو نهايتي قربت
ام ماهر: لك تفي من تمك.. لا تحكي هيك.. جهزي حالك بسرعة.. رح روح لعند الدكتورة فورا
لبسو تنيناتن وراحو لعند الدكتورة..
الدكتورة: شو عندك ولاد
ندى: ما عندي دكتورة.. يعني ما حاترك حد وراي وقت موت
الدكتورة: لشو هالتشاؤم كلو.. كم صرلك متزوجة
ندى: تسع سنين
الدكتورة: كتبتلكن ع فحوصات.. عمليهن وتعي لعندي
راحت ندى وعملت كل فحوصوتا ورجعت لعند الدكتورة وهي قلبا رح يوقف من الخوف..
ندى: شفتي يا مرت عمي.. ربنا ما عطاني ولاد لحتى ما يتعزبو وقت اتركن
ام ماهر: لا اله الا الله.. لك لا عاد تحكي هيك ابدا
دخلو لعند الدكتورة وعطوها الفحوصات..
الدكتورة: مبروك حبيبتي.. الف مبروك.. انت حامل
ندى وحماتا وقفو تنيناتن مصدومين..
ندى: دكتورة مستحيل ..مستحيل رجعي تاكدي مستحيل
الدكتورة: حبيبتي حملك واضح.. من لما شفتو ع الجهاز.. بس حبيت اتاكد من فحص الدم وقت قلتولي انو ما بتجيبي ولاد
ندى بلشو دموعا ينزلو متل الشلال وضمتا للدكتورة من غير وعي ..كانت عم تبكي وتضحك.. ضمت حماتا يلي كانت عم تبكي متلا..
طلعت ندى من عند الدكتورة .. لبرا الغرفة.. صارت تتفتل بين الصبايا يلي عم ينتظرو دورن عند الدكتورة.. وهي عم تضحك وتبكي..
ندى: انا حامل حامل.. لك انا حامل.. والله حامل.. لك انا حاااااامل.. سمعو كلكن انا حاااااامل
سجدت ع الارض قدامن كلن: الحمد لله ..الحمد الك يا ربي.. الحمد الك
وهلأ ندى كل سنتين عم تجيب ولد مرة وبنت مرة ..عندا هلأ تلت ولاد وتلت بنات.. وكلن متل القمر واحلا
انتهت







   رد مع اقتباس

قديم 08-08-2018, 03:27 PM   رقم المشاركة : 2
معلومات العضو
^كــاتم أســرار^
المدير العام
 






^كــاتم أســرار^ غير متواجد حالياً

رد: ملائكة الأرض ـ بقلم أمل أحمد

شكرا لك والله يعطيك العافية


كاتم أسرار






   رد مع اقتباس

إضافة رد

مواقع النشر (المفضلة)


جديد مواضيع قسم منتدى القصص والروايات الاكثر شعبية
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 04:57 PM.


Powered by vBulletin® Version 3.8.8, Copyright ©2000 - 2019, Jelsoft Enterprises Ltd.
SEO by vBSEO 3.6.0 PL2
المقالات والمواد المنشورة في منتدى النرجس لاتُعبر بالضرورة عن رأي منتدى النرجس ويتحمل صاحب المشاركه كامل المسؤوليه عن اي مخالفه او انتهاك لحقوق الغير