العودة   منتدى النرجس > المنتديات الأدبية > منتدى القصص والروايات الاكثر شعبية



إضافة رد
 
LinkBack أدوات الموضوع
قديم 07-08-2018, 10:46 PM   رقم المشاركة : 1
معلومات العضو
وليدالحمداني
إدارة الموقع
 







وليدالحمداني غير متواجد حالياً

 

Questionmark أحبتني جنية ـ قصص رعب

أحبتني جنية ـ قصص رعب

الفصل الاول
كانت الدنيي عتمة كتير وزخات المطر عم تنزل ع قزاز السيارة وصوت الرعد بكل مكان وهو عم يتفتل بالسيارة وعم يدور ع شي زبون يطالعو معو باخر هالليل.. وفجأة طلعت قدامو بنت وصدما بالسيارة
علاء.. يا لطيف يا لطيف..لك شو صرلك اختي لك من وين طلعتيلي
هالة.. ااخ رجلي اااخ
علاء.. خليني ساعدك وقفي ..طلعي بالسيارة لاخدك ع المشفى
هالة.. مشفى. لاااا ما بدي بس وصلني للبيت
علاء.. لك خليني اخدك ع المشفى اطمن عليكي بلا ما يكون صايرلك شي
هالة.. ازا ما بدك توصلني خلص بروح لحالي
علاء.. لك لاا لا خلص اطلعي رح وصلك
ركبت هالة بالسيارة من ورا وعلاء شغل سيارتو وبلش يسوق
(علاء شب باول عمرو عايش مع امو لحالن وما الن حدا شب حلو وهادي وعم يشتغل ع سيارة اجرة ..وهالة بنت كتير حلوة بيضة كتير وبشرتا متل الحرير وشعرا اسود وساحل كتييير وطويييل كتييير)
علاء.. لك يا اختي كيف بتطلعي بهيك وقت لحالك ما بتخافي
هالة.. اولا انا اسمي هالة تانيا انا ما بخاف.. انا بخووف وضحكت ضحكة ناعمة وهادية
طلع علاء بمراية السيارة لحتى يشوف صاحبة هالضحكة بس شاف مرة عجوووز كتير عيونها وساع كتير وحمرر وشعرا ابيض كلوو ونازل ع عيونا ومنكوش ووشا مجعد.. نقز علاء واطلع بالسيارة من ورا.. بس شافا لهالة عم تطلع فيه بهدووء وتتبسم
فتل حالو علاء لقدام وهو مستغرب من حالو ..لوين وصلك من اي طريق
هالة.. من هون
علاء.. بس هاي طريق المقبرة
هالة.. اي بيتنا قريب من المقبرة
هز راسو علاء باستغراب من موقع بيتن.. طيب انت متاكدة انك منيحة
هالة.. لك اي ما فيني شي ..خلص خلص وقف هون.. يسلمووون
علاء.. وينو بيتكن
هالة.. من هالطريق هاي. ما فيك تفوت السيارة فيها رح كمل مشي
علاء.. لكن استني رح انزل وصلك
هالة.. لا ما في داعي خليك بكمل لحالي
علاء.. اي براحتك مع السلامة واسف كتيير
هالة.. ولا يهمك سلام
علاء.. اي والله هالبنت شكلا غريب كتير وتصرفاتا اغرب كمان
(ببيت علاء)
علاء.. مسا الخير امي
ام علاء.. اهلين يامو .لك ليه هيك تاخرت والله قلبي غلي عليك.. مين رح يطلع من بيتو بهيك وقت يامو ..اوعا تعيدا
ضحك علاء وباس راسا لامو.. تصبحي ع خير امي انا تعبان
ام علاء.. لك استنا تعشا وبعدا نام
علاء.. ماني جوعان امي اكلت ..كتير تعبان رح نام لحتى اصحى بكير
دخل علاء ع غرفتو وغير تيابو ونام وفجأة وهو نايم صحي ع صوت حد عم ينادي ..فتح عيونو وشاف المرا العجوز نفسا يلي شافا بمراية السيارة .كانت واقفة حد سريرو وعم تطلع بعيونو بغضب. حاول يصرخ بس صوتو ما طلع ابدا وبلش ينخنق.. صار يحاول يحرك حالو بس كمان ما قدر ..كان خايف كتير ومتوتر كتير من منضرا للعجوز يلي كانت لساتا واقفة وعم تقرب عليه شوي شوي لحتى وصلت لعندو وحطت ايديها ع رقبتو وبلشت تخنق فيه وهو عم يحاول ويحاول يفلت حالو منا ومانو حسنان ابدا ..وعم تضغط وتضغط ع رقبتو لحتى كان نفسو رح ينقطع وضلت لهيك لحتى فجاة امو فتحت الباب لحتى تشوفو وتطمن عليه ..قام ركض علاء من سريرو ووقف ع الشباك
ام علاء.. شباك يا ابني ليه هيك ركضت ع الشباك.. لك وشك اسووود
علاء ما كان حسنان يحك شي وكان يتنفس بصعوبة ..وهو واقف ع الشباك وعم يحاول يتنفس شاف بنت واقفة ورا الشجرة يلي مقابيل بيتن .كانت عم تطلع فيه لعلاء ..ركز علاء فيها كانت هي نفسا ..كانت هالة عم تطلع فيه وتتبسم
علاء.. لك العما شو جابا هاي لهون وكيف عرفت عنواني
ام علاء.. لك مين يامو مين
ونزل ركض ع الشارع لحتى يشوفا بس ما لقيا ..صار يطلع بكل مكان وهو عم يدور عليها بس ما لقيها ابدا ورجع ع البيت وهو كتير متلبك وتعبان
علاء.. هاد حلم.. اي اكيد حلم ..كابوس هاد كابوس انا ما شفت شي اكيد هاد كلو من ضغط الشغل اكيد
ام علاء.. لك اسم الله عليك.. عم تحاكي حالك. لك شو صاير ليه هيك نزلت ركض
علاء.. هاا. لا ولاشي امي كنت حابب اتمشى شوي
ام علاء.. لك في حد بيتمشى بهيك برد وكمان تحت المطر. لك شوف كيف اواعيك كلن مي
علاء.. لك امي انا بحب المطر
ام علاء.. لك وهاي يلي ع رقبتك شوو
علاء.. اوووف امي شو في كمان
ام علاء.. لك اطلع بالمراية. لك هاي علامات اصابع
علاء.. امي انا تعبان كتير خلص بدي فوت كفي نومتي دخيلك تركيني
ام علاء.. يا ربي دخيلك ساعدني عليه يا رب
فات علاء ع غرفتو واطلع بالمراية كانت علامات اصابع كتير واضحة
علاء..لك معناها انا ما كنت عم احلم.. يا ربي شو يلي عم يصير معي
تحمم علاء لحتى يصحصح شوي وطلع من غرفتو لحتى يمشي ع شغلو بعد ما كان الوقت صار الصبح
ام علاء.. صباح الخير يامو..كيف صرت هلأ
علاء.. انا منيح يا روحي لا تقلقي.. هاتي ايدك لبوسا
ام علاء.. ربي يرضى عليك يا ابني ويسرلك امورك كلا
طلع علاء من بيتو وركب سيارتو وشغل السيارة واطلع بالمراية لحتى يتحرك.. واول ما اطلع فيها شاف المرة العجوز نفسا عم تطلع بغضب .نقز علاء وبسرعة فتح باب السيارة وطلع منا
علاء.. لك وبعدين شو يلي عم يصير. انا ما لازم خاف منا .وفتح علاء باب السيارة وقعد ع الكرسي
..........................................
الفصل الثاني
طلع علاء بالسيارة وتحاشى يطلع بالمراية وفتل حالو لحتى يطلع ع الشارع ويرجع السيارة لورا
علاء.. لك شو هاد.. من وين اجت هاي ..لك اول مرة بشوف غطا مراية بهالبشاعة هاي.. وريحتو بهالبشاعة هاي كمان.. اي خليها هون لنشوف مين صاحبا
(كانت مراية صغيرة وغطاها مصنوع من جلد اسود بشع كتير وريحتو كتير سيئة)
مشى علاء بالسيارة وبلش يتفتل بالشوارع .شاف رجال عم ياشرلو ..وقف علاء وركب الرجال بالسيارة
الرجال.. اففف لك شو هاد .شو هالريحة هاي.. لك انتو بس شاطرين تاخدو منا كم ليرة زيادة .لك نضفو سياراتكن بالاول. لك كيف متحملا لهالريحة كيف
علاء.. شو يلي عم تحكي يا اخي. انا سيارتي نضيفة وما حدن شكا مني من قبل
الرجال.. لك انت لازم تفحص حاسة الشم عندك. وقف وقف هون ونزلني.. زت كم ليرة عليه لعلاء.. خوود مع انك ما بتستاهلن
وطلع الرجال من السيارة وسكر الباب بكل قوتو
علاء.. يخرب بيتك الهي
مشى علاء بالسيارة وكمل مشوارو بالشوارع من شارع لشارع ومن طريق لطريق.. ومن بعيد شاف صبية عم تاشرلو .اطلع فيها كانت هالة.. قرب السيارة منا بس طلعت مانا هالة
علاء.. ههههههه لك والله جنيت رسمي انا
طلعت الصبية بالسيارة وحكتلو عن المكان يلي رح تنزل فيه. مشي علاء وبعد شوي سمع صوت انينا للبنت فتل راسو وكانت البنت حاطا ايديا ع رقبتا وهي مخنوقة.. وقف علاء السيارة بسرعة ونزل منا وطالع البنت
علاء.. شو صرلك شو صرلك
البنت وهي كتير مخنوقة ومانا حسناني تحك..اااااانا ما بعرف.. فجأة حسيت وكانو ايدين ع رقبتي عم تخنقني
اطلع علاء ع البنت كانت علامات اصابع ع رقبتا ..ما حكالا علاء شي لحتى ما يخوفا اكتر
علاء.. سلامتك يا اختي.. اطلعي لوصلك
البنت.. لااا خلص بكملا مشي ..شكرا الك
علاء.. انتبهي ع حالك منيح
باينتو هاليوم ما رح يمشي ع خير.. يا ربي استر يا رب
مشى يوم علاء بصعوبة شي باشرلو ولمن يوقف يطلع فيه باشمئزاز وما يعود بدو يطلع معو وشي يفوت السيارة ويضل مسكر انفو وشي يسبو لعلاء ويطلع من السيارة قبل ما يكمل مشوارو.. وعلاء مستغرب من يلي عم يصير .
مشى اليوم ورجع علاء ع بيتو ..كان الجو برد كتير وعتمة كتير وصوت زخات المطر ع القزاز ..وقف علاء سيارتو وبدو ينزل منا ..واطلع بالمراية لحتى يصف سيارتو وفجأة طلعتلو العجوز بالمراية وهالمرة بلشت تطلع اصوات كتير عالية وتناديلو بصوت حاد كتيييير ..علاء ما تحمل الصوت حط ايدو ع باب السيارة وبدو يفتحا لحتى يهرب ..وبسرعة كبيرة ومع صوت الرعد وضو البرق وزخات المطر يلي عم تضرب بالسيارة ايد العجوز انحطت ع ايدو لعلاء وما خلتو يفتحا للسيارة وضلت تصرخ وتصرخ والصوت يعلا ويعلا ..وعلاء عم يحاول يسحب ايدو ويرجع لورا بكل قوتو ليفلت حالو منا والصوت عم يعلا ويعلا وينادي باسمو لعلاء
علاء.. لك حااااج لك ماني حسنان اتحمل اكتر حااااج.. اطلع علاء لورا ليشوف شي يساعدو بانو يخلص منا او يكسر قزاز السيارة فيه وتفاجأ بالعجوز لفتو من ورا
وهاد اخر شي شافو علاء
.......................................
الفصل الثالث
وما صحي علاء الا بالمشفى ع صوت امو يلي عم تبكي حدو وقلبا محروق على ابنا
علاء..ااخ لك وين انا يامو وين شو يلي صار
ام علاء.. يا عيوني يامو.. الحمد لله انك صحيت
علاء.. امي شو يلي صار
ام علاء..تاخرت كتير بالرجعة ع البيت وغلي قلبي عليك وفتحت الباب ووقفت اتفرج ع الشارع واستنا وبعدا شفتا لسيارتك بالموقف ..استغربت ورحت لشوفك. كنت متسطح بالسيارة وغايب عن الوعي
علاء.. ما تخافي امي. هاد كلو من التعب
ام علاء.. لك ايا تعب هاد.. لك مانك شايف العلامات ع جسمك.. لك شوف رقبتك وشوف ايدك كيف شكلا.. لك حتى الدكتور خاف لمن شاف هالعلامات.. انت مع مين متخانق.. احك يا امي برضاي عليك. شو يلي صاير معك
علاء.. ما تخافي امي.. خناقة بسيطة مع زبون وخلصت
ام علاء.. لك كيف خلصت وانت كنت رح تروح فيها
علاء.. خلصنا امي انا تعبااان
ومع دخلة الدكتور عندن ع الغرفة.. هاي صحي علاء. الحمد لله ع سلامتك ابني
علاء.. الله يسلمك دكتور.. ايمت فيني اطلع
الدكتور.. هلأ ازا بدك ..بس ما بدك تتشكى للشرطة عن يلي عمل فيك هيك
علاء.. كانت خناقة بسيطة وماني حابب كبرا.. مانا حرزانة دكتور
الدكتور.. اي براحتك.. هلأ رح اكتبلك ع خروج
طلع علاء من المشفى وروح مع امو ع البيت كان الوقت العصر نام علاء وغرق بالنوم وكانو من سنة ما نام.. وباخر الليل علاء صحي ع الصوت نفسو يلي سمعو بالسيارة ..صوت حاااد كتير وعم يناديلو ويحكيلو رووح لعندااا روووح.. نقز علاء من نومو وقام من سريرو ع الشباك فورا لحتى ياخد نفس ..كان عم يتنفس بصعووبة
علاء.. يا ربي ساعدني
اطلع علاء ع الشارع كان في ضو كتير صغير عم يضوي ويطفي خلف الشجرة يلي مقابيل بيتن.. اطلع منيح علاء وركز لعند الضو كانت هالة واقفة وعم تطلع فيه وتتبسم.. دب الرعب بقلبو وخاف كتيير لمن شافا بهيك وقت واقفة بس استجمع قواه
علاء.. انا لازم انهيها لهالمشكلة لاازم
لبس علاء جاكيتو ونزل ع الشارع ليشوفا لهالة ..كانت واقفة وعم تطلع عليه وتتبسم بهدوء وهو عم يقرب منا وجسمو كلو عم يرجف .هو عم يقرب عليا ببطء وبخوف كبير وهي عم تطلع فيه وتتبسم وما تحركت من مكانا ..ولمن قرب علاء عليها شافا للعجوز اجت من ورا ضهرا لهالة وبلشت تصرخ باعلا صوتا وتحكي حكي مانو مفهوم.. ركضت هالة باقصى سرعتا وحطت حالا بحضنو لعلاء وهي عم تبكي.. حضنا علاء بغير وعي وبكل قوتو وغمض عيونو لحتى ما يشوفا للعجوز.. وفجأة وحدة سكت الصوت
هالة (تبكي)........
علاء.. لك مين انت وشو قصتك وكيف عرفتي عنواني ومين هالعجوز هاي
هالة.. ما رح اقدر احكيلك شي هون.. بكرة تعا بنفس هاد الموعد ع بيتي ورح خبرك كلشي
علاء.. بس انا ما بعرف بيتكن
هالة.. ما رح تضيع.. بس توصل الشارع يلي وصلتني عليه نزل من السيارة وكمل مشي بالطريق يلي شفتني فتا وباخرا رح تلقا للبيت ما في غيرو بهالمنطقة
مشت هالة لقدام وفجاة وحدة اختفت مع العتمة ..رجع علاء ع بيتو وهو كتير متلبك وخايف وميت سؤال وسؤال براسو بدو جواب لالن
علاء.. لازم روح لعندا وافهم كلشي لحتى اخلص من هالحالة ..والله رح جننن والله
تاني نهار قرر علاء يروح لشي حدن بيعرف بامور السحر والشعوذة لحتى يستشيرو .. جهز حالو وراح لعند رجال بمنطقة تانية بيعرف بهيك امور.. فات علاء لعند الرجال يلي كان منضرو بشع كتير وشعرو مانو محممو من ايام. واستقبلو الرجال بنشااافة وبضيق صدر.. حكا علاء للرجال كلشي صار معو بالتفصيل من يوم دعسا للبنت بالسيارة
الرجال.. قلتلي بتطلعلك بالمراية؟
علاء.. اي
الرجال.. لازم تكون خلتلك شي مراية او قزاز عاكس ببيتك او بسيارتك
مباشرة علاء تزكر المراية يلي كانت بسيارتو.. لك اي صح انا بنفس الليلة لقيت مراية صغيرة غريبة بسيارتي
الرجال.. اي ممتاز هون رح يكون حل مشكلتك.. اسمع.. رح تروح لعندا بنفس الموعد ورح تاخد المراية معك ..بتحطا بجيبك واوعا تشوفا لانو رح تاخدها منك.. واول ما تشوفا للعجوز بتكسرا للمراية
علاء.. اي تمام.. بس الغطا يلي عليها
الرجال.. غطا شو
علا.. غطا اسود وريحتو كتييير بشعة متل كانو جلد
الرجال.. هههههههه لك هاي شكلا بدا اياك وحبتك
علاء.. شووووووووو
الرجال.. اسماع.. هالغطا بس للمحبة.. هالبنت حبتك وما رح تتركك الا ازا كسرتا للمراية اول ما تشوفا للعجوز
علاء.. وازا ما قدرت
الرجال.. رح تروح عليك.. ورح تبقى بعالم الجن لحتى تموت
طلع علاء من عند الرجال وقلبو عم يوجعو وعم يفكر بيلي رح يعملو ..ويفكر بامو المسكينة يلي ما الا غيرو
رجع علاء ع بيتو وقعد مع امو وكانو عم يودعا وع الموعد جهز حالو علاء وركب بسيارتو وحط المراية بجيبو ومشى.. وقف السيارة بالمكان يلي نزلت هالة فيه ونزل من السيارة ..كانت طريق دياق كتير وترابية وكلا شوك وحجار والجو كان كتير برد والهوا عم يضرب بوشو لعلاء والعتمة بكل مكان .. ضلو يمشي بهالطريق لحتى شاف غرفة صغيرة فيها ضو كتيير خافت
علاء.. لك هاد هو البيت
دق علاء الباب واستنى شوي.. وهو عم يستنا نفتح الباب لحالو شوي شوي وفات علاء ع الغرفة الصغيرة .
....................................
الفصل الرابع
كان فيها ضو كتيير صغير لمن فات علاء بلش الضو يضوي ويطفي وفجأة هبت ريح قووية كتير سكرت الباب بقوة والضو طفا وطلع صوت كتييييير عالي ..ووقع علاء بارضو مغمى عليه
صحي علاء لقى حالو بغرفة كتير صغيرة اشبه بالقبر حيطانا سودا وكلا دم وما فيها ولا منفس وكانها صندوق مسكر من كل الجهات.. فتح عيونو وبلش يطلع بكل مكان بخوف وتوتر والعرق عم يتصبب من جبينو.. لك وين اناا وييين
وطلع صوت ناعم كتير من ورا ..كانت هالة واقفة ولابسة فستان ابيض طويل.. انت عندي علاء. عندي انا
علاء.. لك مين انت وشو بدك فيني
هالة بضحكة ناعمة كتير وبنضرة خبيثة.. انا قدرك يلي رح تكفي معو باقي عمرك
علاء.. لك بعدي عني
هالة.. علاء انا بحبك كتير وبدي اياك بدي نكون سوا انا وانت
علاء.. وشو قصتا لهالعجوز
هالة.. هالعجوز هي الحارس علي وعملت كل شي لحتى توصلك لعندي هون ..حتى البنت يلي ركبت معك بالسيارة كانت رح تموتا لحتى ما حد يقرب عليك غيري.. انا وبس علاء انا وبس
علاء بلش يتذكر بحك الرجال عن المراية وحط ايدو بجيبو بكل هدوء لحتى يطولا
ضحكت هالة بصوت عالي كتير.. عم تدور ع هاي (وكانت حاملة المراية بئيدا).. شايفا لهاي.. هاي يلي رح تربطك فيني طول عمرك
علاء.. بس انا ما بعرف شو يلي تحت الغطا
هالة.. حابب تشوف (شالت الغطا عنا) وكانت مراية صغيرة ع شكل قلب وعليها صورة كتير باهتة وكانها مو بايني .كانت هالصورة لعلاء
هالة.. هالصورة هاي كل ما عشنا سوا اكتر رح توضح اكتر واكتر ورح تصير هالمراية مجرد صورة الك بهالقلب
بلش علاء يصرخ بشكل هستيري.. انا مااا رح كون الك ما رح كون ابدا
عصبت هالة ..لك انت ليه ما بدك اياني لك شوف شوف انا حلوة كتير وناعمة كتير رح تحبني بوعدك
علاء.. ما رح يصير هالشي ابدا
هالة عصبت كتير وبلشت تصرخ باعلى صوتا وفجاة ظهرت العجوز من ورا ضهرا لهالة وركضت باتجاه علاء.. علاء ركض باقصى سرعة واخد المراية من ايدا لهالة وبسرعة كسرا بالارض
هالة.. لك لاااا ااااخ اااااخ لك شو عملت انت شو عملت
كانت عم تصرخ هي والعجوز باصوات كتير عاالية وبتخووف ..وصدا صوتن عم يملي الغرفة ودخان كتييير وكانو ضباب ملا المكان
غطا علاء ادانيه لحتى ما يسمعن وتكور ع حالو بالارض وغمض عيونو ..كان جسمو كلو عم يرجف وقلبو بيدق بسرعة كبيرة والاصوات والدخان بكل مكان.. وفجأة كل شي سكت وهدي.. فتح علاء عيونو لقي حالو بالطريق الدياق والغرفة قدام عيونو وكانو ما فاتا ابدا والدنيي صارت نووور والضو طلع
تسطح علاء ع الارض وضحك ضحكة كلا خوووف ودموعو عم ينزلو من عيونو ..
انتهت... رايكن







   رد مع اقتباس

قديم 08-08-2018, 03:26 PM   رقم المشاركة : 2
معلومات العضو
^كــاتم أســرار^
المدير العام
 






^كــاتم أســرار^ غير متواجد حالياً

رد: أحبتني جنية ـ قصص رعب

شكرا لك والله يعطيك العافية


كاتم أسرار






   رد مع اقتباس

إضافة رد

مواقع النشر (المفضلة)


جديد مواضيع قسم منتدى القصص والروايات الاكثر شعبية
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 04:58 PM.


Powered by vBulletin® Version 3.8.8, Copyright ©2000 - 2019, Jelsoft Enterprises Ltd.
SEO by vBSEO 3.6.0 PL2
المقالات والمواد المنشورة في منتدى النرجس لاتُعبر بالضرورة عن رأي منتدى النرجس ويتحمل صاحب المشاركه كامل المسؤوليه عن اي مخالفه او انتهاك لحقوق الغير