العودة   منتدى النرجس > المنتديات الأدبية > منتدى القصص والروايات الاكثر شعبية



إضافة رد
 
LinkBack أدوات الموضوع
قديم 08-08-2018, 11:20 PM   رقم المشاركة : 1
معلومات العضو
وليدالحمداني
إدارة الموقع
 







وليدالحمداني غير متواجد حالياً

 

Questionmark شتاء مظلم

شتاء مظلم

(الجزء الاول)
رح بلشلكن بالتعريف عن حالي.. انا اية وقت بداية قصتي كان عمري 14 سنة.. نحنا عيلة كبيرة كتير.. ستي بتحب لمتنا كتير.. ونحنا تقريبا كل يوم بنلتم عندا ..كل عمومي وولادن..
فادي ابن عمي ..شب مميز من كل النواحي.. كتير بتعجبني ركازتو..
بداية حبنا انا وفادي كان حب طفولي.. من وحنا صغار كنا ع طول سوا.. لعبنا سوا وقعدتنا سوا.. ع طول كان يشتريلي اشيا زاكية والكل يسال انو ليه بس لالي وكان يقلن هي حبيبتي ولا حد يدخل..
كبرنا وبعدنا عن بعض.. صار حبنا بالسر مخبى بقلوبنا.. نظرات عيونا بجمعاتنا كانت تفضحنا.. ما كان بئيدي ابدا.. كل ما كنت شوفو او اسمع صوتو دقات قلبي تزيد وتعلا وحرارة جسمي ترتفع..
ليالي قضيتا بالبكي والعذاب من شوقي لالو.. شوقي لاحكي معو شي كلمة.. وقلو قديش بحبو..
ستي حست علينا انو نحنا لسا بنحب بعض..
ستي: امجد.. انت شو عم تستنا... انا بدي جوز هالولاد وريح بالن وبالي
امجد: ايا ولاد امي
ستي: عم تجدبا.. يعني مو ملاحظ ع بنتك انو بدا ابن عما؟
امجد: عم تحكي جد امي.. لا والله مو ملاحظ
ستي: اليوم المسا جمع العيلة كلا.. بدنا نقرأ فاتحتن
امجد: تكرمي امي
انا وفادي ما كنا عرفانين بشي.. تجمعت كل العيلة ...
ستي: فادي
انا مجرد ما سمعت اسمو دق قلبي مدري كيف
فادي: اي ستي
ستي: تعا لعندي.. اية تعي بنتي
انا انصدمت.. انو انا.. وفادي.. سوا.. حدا لستي.. وشي صار احمررر وحرارتي ارتفعت وقلبي ع شوي رح يوقف
ستي: لك شبك جمدتي
اية: س...س...ستي انااااا
ستي: لك شو انت.. تعي لعندي
فادي ع شوي كان بدو يفرط ضحك.. كان كاتم ضحكتو وما بدو يخجلني..
رحت لعندا لستي.. اجر تقدم واجر تاخر..
مسكت ستي ايدي.. والايد التانية مسكت فادي...
ستي: هدول التنين الزعران بيحبو بعض.. وكلنا بنعرف هالشي من صغرن.. وانا اليوم بدي اجمع قلوبن وريحن من وجع القلب.. من هاليوم فادي واية لبعض..
وحطت ايدي بئيد فادي..
مدري شو صار فيني.. كهربا او نار او مدري شو ..
فادي مسكا لايدي وضغط عليها بقوة.. وانا بلشت بكي..
ستي: لك لشو بتبكي يا روح ستك.. ازا ما بدك ياه خلص بلاها.. تروك ايدا ستي تروك
اية: لا لا ستي.. عم ابكي من فرحتي
الكل صار يضحك من قلبو ....
ستي: يالا قومو وقعدو حد بعض بدي اتهنى بشوفتكن سوا..
بوستا لستي : ربي يخليلي اياكي وما يحرمني منك
ستي: ربي يسعدكن.. من اليوم انتو مسؤولية بعض.. اوعكن تزعلو بعض بزعل منكن
فادي: ولا يهمك ستي.. اية بعيوني التنتين (شد ع ايدي)
هاي كانت بداية قصتي مع فادي حبيب قلبي وروحي
(الجزء الثاني)
استمرت خطبتنا سنة كاملة.. جهز فادي البيت يلي رح نسكن فيه..
فادي: اية ماني مصدق ايمت رح نجتمع سوا
اية: وانا يا روحي.. شد شوي بشغلك لحتى نخلص
فادي: لك والله والله لو بئيدي لاشتغل 24ساعة بس لخلص البيت وتزوج
اية: والله بعرف يا روحي.. ربي يخليلي اياك
مسك ايدي وحطا ع وشو..
فادي: اااخ شو بحبك.. كلشي فيكي بيجنن ..نعومتك ريحتك كلك ع بعضك بتجنني
سحبت ايدي بخجل ..
فادي: حبي..لك لسا بتخجلي مني
اية: فااادي
فادي: لك يا عيونو لفادي.. لك اسمي طالع غير شكل من هالشفاف الحلوة.. تسلمي لالبي يا البي
كانت خطبتنا حلوة كتير.. عشنا فيها لحظات كتيير حلوة
واجا يوم زواجنا..
اية: لك قلبي بدو يوقف
هديل: اختيييي.. لك شبك.. هدي شوي حبي.. لشو الخوف
اية: ما بعرف.. بس حاسة اعصابي تلفت من الخوف
هديل: لا تخافي حبي.. لك ما حدا قدك.. رح تاخدي الشب يلي حبيتي..ورح تجتمعو سوا
تم عرسنا يلي كان من احلا الاعراس والحفلات..
فادي: باجرك اليمين حبي
دخلنا البيت وتقفل علينا الباب .. مسك ايدي فادي وباسا وباسني من جبيني
فادي: ربي يباركلي فيكي.. ويقدرني اسعدك ..ان شاء الله كل ايامنا فرح وما نشوف الحزن ابدا
نزلو دموعي وضميتو لفادي وبكيت ع صدرو ..
فادي: يا عمري.. لشو هالبكي
رفع راسي بئيدي ومسحلي دموعي
فادي: هالدموع هاي ما بدي شوفا ابدا طول ما انا ع وش هالدنيي
اية: ربي ما يحرمني منك ويخليلي اياك
حبنا يلي بلش حب طفولي وكبر بخطبتنا رجع كبر اكتر واكتر بعد زواجنا.. كل يوم كان يمر علينا نحب بعض اكتر واكتر.. حبنا كان متل الاسطورة.. ادينا ما تفارق ادين بعض.. سوا بكلشي بحياتنا..
وهالحب الكبير تزين بولادنا.. محمد.. قصي.. انس
تلت ولاد حلو دنيتنا وكبرو حبنا اكتر واكتر...
(الجزء الثالث)
مشت الايام والسعادة غمرت حياتنا اكتر واكتر..
اية: فادي ..هلا ليه بيقولو انو بعد الزواج بيروح الحب
فادي: حبيبتي هدول بيكونو ما بحبو بعضن.. يلي بيحب من قلبو مستحيل حبو يوقف غير بموتو
حطيت راسي ع صدرو وتنهدت
اية: ربي ما يحرمني منك ومن حبك
وبيوم فجاة ومن غير مقدمات فادي تعب كتير
اية: فادي حبيبي قوم لنروح لشي دكتور
فادي: ماني حسنان اتحرك.. عمليلي زهورات ..هلأ بتحسن
عملتلو زهورات.. شربا ونام..فقت عليه بنص الليل وهو بينين من وجعو.. دقيت لعمي فورا..
اية: مرحبا عمي
عمي: خير يا بنتي صاير معكن شي لتتصلي بهيك وقت
اية: فادي تعبان كتير مدري شبو
عمي: جايي فورا
اجا لعنا عمي واخدو لفادي ع المشفى.. وبالمشفى طلبو فحوصات كتيرة..
اسبوع كامل ونحنا كل يوم تحليل شكل ومانا فهمانين شي..
اية: بترجاك دكتور.. شبو زوجي.. سبع ايام وما خف وجعو.. بترجاك طمنلي قلبي
اطلع في الدكتور ....
الدكتور: سمعي يا بنتي ما بدي خبي عليكي.. نحنا شاكين بمرض كبير بزوجك.. بس ان شاء الله هالشكوك تخيب
مدري شو صرلي وقت قلي هيك.. سواد سواااد وعتمة دخلت لقلبي... حسيت قلبي رح يوقف..
رجعت فورا ع البيت توضيت وصليت ركعتين وقعدت ع السجادة ودعيت ودعيت ودعيت.. وبكييييييت كتييير
بعد كمان اسبوع...
الدكتور: فادي.. ابني انا ما بدي خبي عليك.. انت لازم تعرف ..انت معك سرطان بالدم.. والمرض منتشر بجسمك كلو
انا سمعتو الدكتور وفتلت في الدنيي.. ووقعت ع الارض.. صحيت وانا عم ابكي ونادي باسمو..
اية: فادي.. فادي.. لا تتركني بترجاك.. ما فيني بلاك حبيبي بترجاك.. والله بموت يا فااادي والله
فتحت عيوني كان فادي قاعد حدي ع السرير عم يقرأ علي قران ويبكي..
فادي: فقتي يا روحي.. لا تعملي بحالك هيك بتعذبيني
ضميتو وبكيت.. بكيت من خوفي ..خوفي باني عيش لحظة من دونو.. خوفي بانو يتركني ويروح.. ما فيني بلا فادي ابداا
كنت ابكي وهو يبكي..
فادي: اية حبيبتي بترجاكي بكفي.. لك انا هيك بموت مييت مرة.. بترجاكي يا روحي
بلشنا فورا بعلاج كيماوي.. شهرين وهو بعذاب الكيماوي ووجعو.. ليالي سودا عاشا ..ليالي وجع ..كل وجع كان يتوجعو كنت حسو بجسمي.. ولادي اهملتن جسمي نحف.. وشي صار اسود..
الدكتور: يا بنتي ما في فايدة والله ما في.. حاجتكن عذاب فوق عذابكن
اية: ما فهمت.. كيف يعني ما في فايدة
الدكتور: زوجك خلص..المرض اكلو جسمو.. ما فينا نعملو شي.. رجعي ع البيت بكفي وجع مرضو ما بدنا نزيدا بالكيماوي
بلشت اضرب بالدكتور بئديي التنتين وصرخ عليه: لاااااا ما فيك تقول هيك ما فيك.. بدك تعالجو لفادي ..بدك تعالجوووو.. مووو بكيفك ..فادي مممنوع يموووت ممنووووووع.. عم تسمع ممنوووع.. فااااادي بدو يعيش.. والله بموتكن كلكن والله..
هاد اخر شي بتذكرو..
(الجزء الرابع) والاخير
فقت ع سرير المشفى والنيرسة حدي عم تهدي فيني وتفرك بئيدي..
اية: فادي.. وينو فادي.. لك ليييش انا هوون.. بعدي عني بعدي بدي روح لعندو بعدي
دفشتا للنيرسي وركضت لغرفة فادي.. كان غفيان ووشو اسود.. قعدت فوق راسو وصرت ابكي ..
فادي: (مغمض عيونو) اية لا تبكي.. لا تبكي حبيبتي بتحرقيلي قلبي
اية: (تبكي) سلامة قلبك يا قلبي.. رح خلص وراقك لوقت ما يجي عمي لنرجع ع البيت
ضحك فادي وهو مغمض عيونو..
فادي: يعني خلص.. خلصت حياتي
اية: لا تقول هيك بترجاك
خلصت وراق المشفى واجا عمي.. كان وشو اسود ومخنوق..رجعنا ع بيتنا.. ليالي من اصعب ليالي عمري.. دموع ووجع قلب..كان فادي خلالن كتير تعبان والناس شي يفوت وشي يطلع..
بعد باسبوع من رجعتنا من المشفى فقت يوما الصبح كان فادي فايق وعم يعمل قهوة بالمطبخ.. انا ما صدقت عيوني وفكرت حالي عم احلم..
اية: صباح الخير.. انت منيح
فادي: لك كانو في سحر فيقني.. مدري شو صرلي.. ماني حاسس بوجع
ضميتو بقوة: حبيبي ..واخيرا رجعتلي يا عمري
قضينا هداك اليوم نحنا والولاد سوا ع لعب وضحك طول النهار..
كانت الدنيي مطر قوي.. وصوت الرعد عم يزلزل البيت.. وزخات المطر بتطرق ع القزاز.. ليلة شتي معتمة كتير..
فقت ع نغزة بقلبي..
اية: اعوذ بالله من الشيطان الرجيم.. فادي حبيبي.. انت بردان كتير
كان جسمو متل التلج ..
اية: فادي.. فادي.. فادي.. لاااااااااااا.. دخيلك يااااا ربي ...لاااااا فااااادي ..لا تروح يا ضو عيوني لاااا تروح ياااا عمري.. فااااادي بترجاك فتح عيونك يا قلبي.. ما فيني بلاك يا روحي فتح عيونك بترجاك..
راح فادي ..مات اي مات مات وتركني عم صارع الدنيي لوحدي..
ربي لا اعتراض على حكمك.. ربي لا اعتراض على ما كتبت.. دقات قلبي تكاد تتوقف.. دماء شراييني تكاد تجف.. الهي يا الله اربط على قلب فقد اغلى ما يملك.. الهي يااااا الله الهمني الصبر والسلوان.. الهي ياااا الله عجل باخذي اليك.. فانا لا احتمل حياتي من دونه..
اجتمعو كلن ع صوتي يلي هز الحارة كلا.. دموعي ما قبلت تنزل.. صوتي عم يطلع ومدري كيف عم يطلع.. يمكن صوت قلبي يلي كان عم يصرخ..
حاولو يهدوني ويسكتوني..
اية: لك بعدووووو عني ..تركونيي ما بدي اسكت.. تركوني صرخ.. مااااا فيني اسكت.. لك فااادي رااااح رااااح.. بترجاكن تركوني تركوني.. ما فيني بلاه
هاي كانت حياتي ..وهون انتهت.. اي هون انتهت حياتي.. انتهت مع اخر صرخة طلعت من قلبي ع فادي.. ومن بعدا ما عاد في قلب.. كلشي وقف.. اي وقف
كنت اسمعن يقولو الدنيي ما بتوقف ع حدا.. اي امبلا بتوقف.. اسالوني لالي ..دنيتي وقفت هون.. وقفت بموت فادي..
انتهت
هالقصة اخدتا من قصة صبية بعرفا.. مات زوجا بالسرطان وهي عم تصارع الحياة من دونو... والله بكيت وانا عم اكتب ... هالانسانة مثال للصبر والمثابرة بالحياة.. وقت توفى زوجا كانت حامل بتؤم بنات يمكن بالشهر الخامس ..هلا ولادا شباب.. وبناتا صبايا.. ربت ولادا ودرستن.. نذرت حياتا كلا لالهم.. عما ساعدا ودعما ماديا.. ابنها الكبير تخرج ورح يتزوج ..والاصغر منو لسا عم يدرس بالجامعة والصغير لساتو بالمدرسة هو واخواتو البنات
بقلم_امل_احمد







   رد مع اقتباس

قديم 10-08-2018, 03:14 AM   رقم المشاركة : 2
معلومات العضو
^كــاتم أســرار^
المدير العام
 






^كــاتم أســرار^ غير متواجد حالياً

رد: شتاء مظلم

شكرا لك والله يعطيك العافية


كاتم أسرار






   رد مع اقتباس

إضافة رد

مواقع النشر (المفضلة)


جديد مواضيع قسم منتدى القصص والروايات الاكثر شعبية
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 05:01 PM.


Powered by vBulletin® Version 3.8.8, Copyright ©2000 - 2019, Jelsoft Enterprises Ltd.
SEO by vBSEO 3.6.0 PL2
المقالات والمواد المنشورة في منتدى النرجس لاتُعبر بالضرورة عن رأي منتدى النرجس ويتحمل صاحب المشاركه كامل المسؤوليه عن اي مخالفه او انتهاك لحقوق الغير