العودة   منتدى النرجس > المنتديات الأدبية > منتدى القصص والروايات الاكثر شعبية



إضافة رد
 
LinkBack أدوات الموضوع
قديم 08-08-2018, 11:24 PM   رقم المشاركة : 1
معلومات العضو
وليدالحمداني
إدارة الموقع
 







وليدالحمداني غير متواجد حالياً

 

Questionmark يا عوضي من اللـه ـ بقلم امل احمد

يا عوضي من اللـه ـ بقلم امل احمد








(الجزء الاول)
ما بعرف ليش بيتزوجو وبيجوبونا ع هالدنيي ازا ما بدن يحمونا ... ربنا قال عنن الامن والامان .. بس ليش هني ما بيعرفو هالشي .. وليش عم يكبونا بالنار بئيدهن ..
انا عهد ... بنت متلي متل كتير بنات نظلمت كتير من اهلي ..
ابي: اي مو بكيفك بدك تتزوجي
عهد: بترجاك يابي .. بدي كمل دراستي .. ما بدي اتزوج
امي: حرام عليك يا رجال .. البنت ما بدا وكمان ابن عما كبير كتير
اخي: امييي .. يعني بدك تعمليلي مشكلة مع مرتي .. ازا ما وافقتو رح يطلقوها لبنتن
عهد: اي وانا شو زنبي اخي .. ليش لتضحي فيني كرمالا لمرتك
ابي: خرسيي ولي .. مو بكيفك .. بدك تاخدي ابن عمك بالغصب
اكيد ما استغربتو من انانيتن .. هالقصص صارت كتيرة ومالوفة عنا
اخي فاضل متزوج بنت عمي .. ويلي هي اختو لعمران يلي تقدملي ..
عمران ابن عمي .. عمرو بهداك الوقت كان 27 سنة .. وانا كان عمري 14 سنة .. اهلي غصبوني عليه بس كرمال اختو يلي هي مرت اخي
تمت خطبتنا انا وعمران .. كانت خطبة عادية .. ما كنت اطلب شي منن ومشت ع خير .. ومن بعدا تزوجنا .. وهون بلش كيد السلف ..
بلشت مرت عمي تعملي مشكلة ع كل شي ومن غير شي بس لانو انا بنت سلفتا .. ما خلت شي ما عملتو فيني .. وكرهت كل اهل البيت فيني .. لوصلت معن يمدو ايدن علي ويضربوني ..
مرت عمي: ولي عهد .. لسا ما خلصتي تعزيل البيت
عهد: مرت عمي والله تعبت .. ما عاد فيني
مرت عمي: لك تضربي من بين الكناين .. تعي بسسسسرعة تعي
عهد: اجيت مرت عمي .. اجيت
شفت منا كتير .. وعانيت كتير .. لدرجة كانت تضربني وما يطلع بئيدي اعمل شي وضل ساكتة
عهد: (تبكي) عمران حرام عليكن .. انا تعبت من امك وابوك .. تعبت منكن كلكن .. ما عم بقدر استحمل
عمران: اي خرجك .. لو بتسمعي الكلمة ما بيهينوكي ولا بيضربوكي
عهد: لك انت كمان عم تحكي هيك .. لك والله ما عم اعمل شي .. لك بس عاملوني متل ما اخي بيعامل بنتكن
ووقت قلتلو هيك جن جنانو ... وكانو سبيتا لاختو ..
عمران: (بعصبية) شو قلتي ست عهد .. عم تقارني حالك باختي ولي .. اياكي تعيديها والا بذبحك .. هاد يلي كان ناقص .. تقارني حالك باختي
هاد مجمل حياتي معن .. تعب وقهر ووجع وذل .. وما كنت استرجي خبر اهلي ايا شي .. ما بعرف ليش .. يمكن كنت خاف من ردة فعل بابا يلي بعمرو ما حسسني انو ابي .. ويمكن خوف من اخي يلي ع طول بصف بيت حماه .. ويمكن خوف من حماتي وقت تدرى .. ما بعرف ليش .. بس ما كنت خبرن ابدا ..
مشت الايام متل الجحيم .. وحبلت .. وكلن فرحو بالحفيد الاول يلي رح يجي ع الدنيا ..
مرت عمي: واخيرا.. الحمد لله رح نستفاد منك بشي .. انتبهي ع حفيدي منيح
عهد: ماشي مرت عمي
مرت عمي: تعا عمران تعا
عمران: اي امي
مرت عمي: انتبه منيح .. ولا عاد تقرب عليها لمرتك .. بلا ما تنزل هالجدبة .. فهمان علي مو
صارو خدودو حمر لعمران وهزلا براسو ..
عمران: اي امي اي .. فهمت
مسكتني من ايدي بقوة واطلعت علي بحدية..
مرت عمي: مو تروحي تلبسيلو لابني ومدري شو .. بلاها هالحركات فهمانة
عهد: حاضر مرت عمي
مشت فترة الحمل ويلي ما كانت احسن من الفترة يلي قبلا .. بالعكس زاد عليها تعب الحمل .. واجت يوم ولادتي لبنتي البكر .. ولدتا بعد تعب ومعاناة ما بيعلم فيها غير الله ..
عهد: لك يا امييييييي.. ما عاد بدي اولد .. لك ما بدي اولدددد
النيرسة: طولي بالك حبيبتي .. تكة وبتكون بنتك بحضنك .. يالا يا عمري ساعديها لبنتك
عهد: ياااا ربي .. يا الله ساعدني
ولدتا لبنتي وغميت من التعب .. ما عاد حسيت ع شي .. فتحت عيوني كانت حماتي حاملتا لبنتي وقاعدة ع كرسي بعيد عني وعم يحكو هي وامي
عهد: بنتي.. بنتي .. عطوني ياها
امي: فقتي يا روحي .. الحمد لله ع سلامتك
كنت يا دوبني قدرانة فتح عيوني ... وعم طالع الحكي بالزور
عهد: امي .. بنتي .. بدي شوفا
مرت عمي: اي بس لترتاحي .. هلا بتوقعيها من ايدك للبنت
امي: اي معلش انا بحملا ياها .. عطيني ياها
ومدت ايدا امي لتاخدا من مرت عمي ..
مرت عمي: اي بعدي .. بعدي هيك .. انا بورجيها ياها
وقربتا حماتي مني لشوفا ..
عهد: عطيني ياها مرت عمي .. بدي ضما
جلست قعدتي واخدتا لبنتي بحضني وضميتا لاشبع من ريحتا وحس بدقات قلبا ..
بهالوقت كان عمري 15 سنة .. كنت لساتني طفلة .. بس مشاعر الامومة ما الها عمر ..
(الجزء الثاني)
ومن هاليوم نكتب علي وجع جديد .. حماتي اخدتا لبنتي لحضنا وكانو هي اما مو انا .. ما كانت تعطيني ياها غير وقت بدي رضعا ..
عهد: مرت عمي .. بدي بنتي .. والله شتقتلا
مرت عمي: لك من هلا بدك تبعديها عني .. مفكرة حالك احق فيها مني .. انا ستا .. واولا منك فيها .. فهمانة
يمكن ما تصدقوني .. بس كنت اشتهي ضما واشبع منا
عهد: عمران .. بترجاك بدي حل .. لك والله مشتهية حطا بحضني واشبع منا .. لك حرام هالشي وربي حرام
عمران: لك انت ما بتشبعي نق .. لك هدول بيت جدا .. هني حرين فيها
عهد: لك انا ما قلت شي .. ياخدوها ويعملو فيها متل ما بدن .. بس كمان انا عم اشتقلا .. حرام هالشي انا يلي تعبت فيها مو هني (تبكي)
ووقت قلتلو هيك ما شفت غير كف بنص وشي ..
عمران: انت يلي تعبتي ست عهد .. والله وصرلك لسان .. لك انت من ايمت بتعرفي تحكي .. لك يا قليلة الزوء هاي حفيدتن الاولى
عهد: وكمان هاي بنتي الاولى .. لك ما بشوفا يا عمران
عمران: خلصنا عهد.. خلصنااا
وهيك مشت الايام .. كل وجعن وعذابن كان بكفة ووجع قلبي ع بنتي بكفة تانية .. كنت عم انحرق من جوا .. عم موت ..
وبيوم كنت مشتاقتلا موت .. كانت معا لحماتي ..
كانت بالمطبخ عم تقطع بطاطا وحاطيتا حدا ..
عهد: مرت عمي .. عطيني لين لوقت ما تخلصي
مرت عمي: شو امرتي ولي .. لك انت ما بتشبعي ضرب .. لازم كل يوم تاكلي قتلة .. لك روحي من وشي يا قليلة الترباية .. لك ما بكفي انو انا يلي عم قطع البطاطا
عهد: مرت عمي انا عزلت البيت كلو وما كنت عم العب .. وانا ماني قليلة ترباية .. بدي بنتي .. (تبكي) لك مشتاقيتلا .. لك حرام عليكي حرام
ووقت قلتلا هيك ما شفتا غير ضربتني بالسكينة يلي بئيدا .. واجت السكينة بئيدي..
مرت عمي: لك خرجك .. الله لا يقيمك .. وعم تبكي كمان يا كلبة
عهد: (تبكي) لك اااخ يا امي .. لك ااخ يا امي .. لك ايدي ... لك ااااااااخ
اجا عمي ع صوتي وانا عم صرخ .. وايدي كانت عم تشر دم ..
عمي: شو في .. لك شو هاد .. شو صاير هون
مرت عمي: هالكلبة عم تعلي صوتا بوشي
عمي: (بعصبية) لك نحنا ما رح نخلص من مشاكلك .. لك تضرب هديك الساعة يلي صرتي فيها كنة النا .. مشي معي .. مشييي
اخدني بوقتا ع المشفى .. وضمدولي الجرح بس للاسف الضربة اتلفت الاعصاب وايدي نشلت ..
امي: لك شو صايرلا لايدك بنتي
عهد: ولا شي امي .. ولا شي
امي: كيف يعني ولا شي .. لك ماعم تقدري تحركيها .. شو صاير معك
عهد: ضربت حالي وانا عم اطبخ امي
امي: الله يهديكي يا بنتي .. الله يهديكي بس .. لك كام مرة بدي قلك نتبهي وانت عم تشتغلي بالمطبخ
وقت قالتلي امي هيك صرت ابكي من كل قلبي .. قهر وذل ووجع .. كلو كان بقلبي وانا لساتني 15 سنة .. والاقسى من هيك انو ما فيني فش خلقي لايا حدا .. كنت خاف قلن .. وكنت خاف كون انا الغلطانة .. ما كنت مستوعبة يلي عم يصير معي .. كنت مخربطة كتير وضايعة ..
وبعد بشي سنتين من ولادتي لبنتي ..
بيوم كنت تعبانة كتير وعندي حرارة قوية ..
عمران: ليش لساتك نايمة .. فيقي
عهد: ماني قدرانة .. بردانة كتير وتعبانة
قرب مني وهو معصب وبدو يضربني .. وقت كشف الغطا عني وشافني كيف كان وشي احمر وتعبان عرف بانو ما عم كزب ..
عمران: باينتو عليكي حرارة .. رح اندهلا لامي
طلع عمران لبرا ليقلا لامو وانا سمعت صواتن من غرفتي..
مرت عمي: لك هاي عم تتحجج لحتى ما تشتغل شي
عمران: امي عم قلك عليها حرارة
مرت عمي: شو يا خروء .. عم تدافع عنا .. اي وازا عليها حرارة .. انا ماني اما لاتحملا .. ياما تعبت بس ما نمت .. كنت اشحط حالي شحط ع الشغل
وقت سمعتن هيك خفت تجي وتضربني هي او عمران .. شلت الغطا لوقف ع رجليي وروح لعندا .. بس وقت وقفت مدري شو صرلي واجريي ما عادو حملوني .. ناديت باعلا صوتي على عمران .. واجا عمران وامو ركض ع الغرفة..
عمران: شو صاير .. شبك
عهد: ماني قدرانة وقف ع رجلي .. بترجاكن (تبكي)
وقت شافوني هيك خافو .. واخدوني فورا ع المشفى..
الدكتور: اي مرتك جسما مرهق كتير .. حمل وتعب
عمران: حامل
الدكتور: اي حامل .. وجسما كتير مرهق .. بدا راحة
وقت عرفت بانو انا حامل فرحت كتير .. وقررت بيني وبين حالي يلي رح يكون ببطني هالمرة مستحيل سلمن ياه لو شو ما صار ..
مشت الايام وفحصت يلي ببطني وكان ولد..
عهد: الحمد لله يا ربي .. الحمد لله .. يا ربي تجعلو سند لالي وراحة لقلبي الموجوع يا الله
ومشت ايام حملي وجبتو لابني ع الدنيي .. تعلقت فيه كتير وصار هو كل دنيتي .. عوضني عن كل غصة حسيتا بغياب اختو .. ما بعرف كيف بيت حمايي سمحولي فيه .. بس ما كنت اقبل اعطيهن ياه وكانو يسكتو ومكتفيين ببنتي الكبيرة ..
وبعد بست شهور من ولادتي رجعت حملت كمان مرة .. وهالمرة كانت بنت..
ولدتا لبنتي من هون ومدري شو يلي صارلو لعمران .. كان عمرا سبع شهور
(الجزء الثالث)
عمران: لمي تيابك بسرعة
عهد: شو في .. شو صاير
عمران: ما صاير شي .. لمي تيابك رح وصلك لبيت اهلك
عهد: ليش .. شو في .. شو صاير عمران
عمران: ما صاير شي .. ما عاد بدي ياكي .. خلصنا .. تعبت منك ومن نكدك
وقت حكالي هيك بكيت .. بكيت من قهري ..
عهد: لك حرام عليك يا عمران .. لك حرام .. بعد كلشي شفتو وتحملتو بدك تكبني هيك وبكل بساطة .. لك مو كرمالي ..كرمال هالصغار
عمران: اي الصغار ما رح يصير عليهن شي .. رح يبقو عندي .. خدي لصغيرة وتركي البقية
عهد: لا .. مستحيل ما بطلع بلاهن .. بموت
مسكني من رقبتي وصار يشد علي ..
عمران: لا تعانديني بلا ما طالعك من هون جنازة .. بسرعة لمي تيابك وتياب الصغيرة
وشال ايدو عني بعصبية .. وطلع براة الغرفة
لميت تيابي وتياب بنتي ودموعي عم يشرو .. عم اطلع بابني وبنتي الكبيرة يلي مانن فهمانين شي ..
خلصت و وصلني لبيت اهلي .. دخلت عليهن وانا مكسورة .. ما في اصعب من شعوري بهداك الوقت .. .. تمنيت لو متت الف مرة ولا نحطيت بهيك موقف .. ويلي كان عم يحرقني اكتر القطعتين يلي من قلبي يلي تركتن عندو لعمران ..
ابي: شو صاير .. ليش تيابك معك
عهد:(تبكي) ما عاد بدو ياني يابي .. رح يطلقني
ضربت امي بئديها التنتين ع وشا..
امي: شوووووووو
قرب مني ابي ومسكني بكل قوتو من ايدي
ابي: وشو عاملة ولي ليطلقك
عهد: (تبكي) والله ما عملت شي يابي .. والله يابي ظلموني وذلوني وقهروني وانا ساكتة .. والله يابي حرموني من اول فرحتي وما حكيت شي .. لك والله ما عملت شي والله
وانا عم احكي معو ما لقيت حالي غير وقعت ع الارض ..
ركضت امي لعندي وضمتني ..
امي: اسم الله يحميكي يا بنتي .. اسم الله
ابي: لك الله ياخدكن تنيناتكن
حطيت راسي بحضنا لامي لاقدر ارتاح شوي .. وبكيت سنين عمري يلي سرقهن عمران واهلو مني .. بكيت ولادي يلي سرقوهن مني .. بكيت وبكيت ..
عهد: ولادي يا امي .. ولادي رح موت يا امي .. ما فيني بلاهن
امي: (تبكي) لا تبكي يا ضو عيوني .. لا تبكي .. بنجيبن يا امي بنجيبن
ابي: مين يلي بدو يجيبن .. اي ما بكفي رح اصرف ع بنتك .. بدك اصرف ع ولادا كمان .. نسيهن لولادك
مشت الايام وقلبي عم ينحرق ع ولادي .. ايام واسابيع وشهور .. كلن وجع ووجع ووجع .. وبعد بسنة بعتلي ورقة طلاقي
مسكتا للورقة وانا ماني مصدقة يلي عم يصير معي .. لك ليش يا عمران .. لك ليش .. لك انا بشو غلطت معك .. بشو اذيتك لتعمل فيني هيك ... وليش يابي ما دافعت عني ووقفتو لاخوك ومرتو وابنو .. ليش لتخليهن يتجبرو فيني ..
مسكتا للورقة وحطيتا بالدرج .. وقررت انسى كل الوجع يلي عشتو مع عمران .. بس ولادي هني يلي كانو كاسرين ضهري ..
وبعد بيومين من ورقة طلاقي سمعت صوت زغاريت وغني ببيت عمي ..
عهد: شو في .. شو صاير .. هاد مو ببيت عمي
امي: اي عندن .. هلا بيجي ابوكي وبنفهم منو
ووقت وصل ابي ..
امي: شو صاير ببيت اخوك .. كانت صواتن طالعة
ابي: اي جوزو لعمران
وقت حكا هالكلمة حسيت بغصة بقلبي .. مو لاني بحبو .. ابدا .. بعمري ما حبيتو .. بس ليش هالغصة ما بعرف .. يمكن الغصة على السنين يلي راحت من عمري مع واحد ندل متل عمران .. مع واحد ما صاني ولا دافع عني ولا حفظ العشرة يلي بينا ...
مشت ايامي متل بعضا .. وبلشت اتعود ع وجع قلبي ع غياب ولادي .. صار هالوجع جزء من حياتي ..
عهد: ااخ يا امي .. شو بكونو هلا عم يعملو .. كيف عايشين .. معقول مرتو لعمران عم تهتم فيهن .. انا لازم شوفن
امي: رح حاكيه لابوكي .. ان شاء الله يقتنع
وبالفعل ربنا هداه لابي وحاكا عمي لاقدر شوف ولادي وصرت شوفن كل شهرين مرة .. يبعتن لعندي خمس ايام.. كان يمضى الوقت معن وما اعرف كيف مضى .. كلو كان عذاب بعذاب..
(الجزء الرابع)
امي: عهد يا عيوني .. بكرة رح يجي العامل ليبلش يشتغل .. بدك تشدي الهمة معي
عهد: حاضر امي
امي: ربي يريح قلبك يا بنتي ويعوض عليكي
دمعو عيوني وغصيت..
عهد: كيف رح ارتاح يا امي وولادي مانن بحضني .. انا عم موت يا امي
امي: والله عم حس فيكي يا قلبي .. بس شو بدي اعمل .. ابوكي ما بدو يصرف عليهن
عهد: لك اااخ بس .. لو معي شي شهادة هلا كنت توظفت او شتغلت شي شغلة وحطيتن لولادي بحضني
امي: خلص يا امي وكلي ربك
عهد: لا اله الا الله .. يا رب اجبر كسري يا الله
وتاني نهار اجا العامل وبلش شغل عنا بالبيت ..
كان شب صغير.. عمرو 29 سنة .. اسمر وطويل
كان كل ما يشوفني ما يشيل عيونو عني .. يضل ملاحقني بنضراتو ..وبيوم..
نديم: لو سمحتي
اطالعت فيه بخوف ..
عهد: اي
نديم: فيني حاكيكي
عهد: بدك شي؟؟
نديم: حابب اسال ازا انو انت مرتبطة او لا
عهد: العفو منك .. انت هون عم تشتغل .. خليك بشغلك
تركتو واقف وعم يطالع فيني وركضت ع البيت وسكرت الباب وراي ..
عهد: ففففف وقفلي قلبي.. هههههه
وبعد هاليوم صرت لاحظ عليه اكتر كيف عم يطلع فيني ع طول .. ويراقبني .. ويهتم فيني
نديم: عهد لو سمحتي .. لا تروحي .. بس سمعي
وقفت وانا رجليا ما عادو حملوني ..
عهد: عم اسمع
نديم: عهد ... انت انسانة كتير طيبة .. والطيبة باينة بوشك .. وبصراحة انا معجب فيكي .. يا ريت لو تفتحيلي مجال لاثبتلك هالشي
ما رديت عليه بشي .. وتركتو واقف عم يطلع فيني ودخلت ع البيت ...
عهد: يا ربي... شو عم يصير معي .. لك ليش هيك قلبي عم يدق كل ما شفتو
وقت حاكاني واطلع بعيوني .. دق قلبي لاول مرة بحياتي .. وهالشي يلي ولا مرة حسيتو معو لعمران طول فترة زواجنا .. حسيت باحساس كتير حلو .. احساس كنت اسمع فيه وما اعرفو .. ومع نديم عرفتو وعشتو..
يمكن لانو النظرات يلي عم يطلع فيها نديم علي ولا مرة شفتا بعيونو لعمران .. وهالاهتمام منو لاول مرة بشوفو من شخص بحياتي ..
ومع هيك ما كان فيني انو اوثق فيه وامنلو .. بس هو ما مل ولا سكت .. ورجع حاول يحاكيني اكتر من مرة .. لوقت بطلت اطلع لعندو واتحجج لامي بايا شي لحتى ما اطلع لعندو ..
وبيوم .. كنت قاعدة ع المرجوحة.. عم فكر بهالدنيا وظلما .. عم فكر قديش فيها بشر سيئين متل عمران واهلو .. عم فكر بولادي يلي ماني قدرانة ضمن لصدري بسبب ابي .. وما شفت غير ايد مسكت ايدي ..
عهد: بسم الله
نقزت واطلعت .. وكان نديم ..
مسكلي ايدي وقرب مني ...
نديم: عهد انا بحبك وبموت فيكي .. ما عاد فيني اتحمل اكتر
كان عم يطلع بعيوني بكل حب .. هالنظرة هاي يلي لاول مرة بحياتي بشوفا وبعرفا .. هالنظرة يلي قادرة تكسر اقسى قلب..
حمرو خدودي ودق قلبي .. ونزلت راسي بالارض.. وسحبت ايدي من ايدو بهدوء ..
ما كان بدي اسحبا ولا بعد عنو .. كنت بدي ضل حدو وجرب شو هو شعور الحب يلي نحرمت منو .. كنت بدي يضل ماسك ايدي لاخر العمر ..
عهد: نديم هلا حدا بشوفنا .. خلص بعد
وبعدتو عني..
نديم: لك تسلميلي ما احلاكي وانت خجلانة .. رح روح هلا .. بس لا عاد تهربي مني
هزيتلو براسي .. وراح..
ومن بعدا بلشت علاقتنا سوا .. عيشني بمشاعر كنت احلم فيها وما اعرفا .. قلبو الطيب وحنيتو نسوني كلشي مر بحياتي .. نسوني عمران واهلو ..
تمنيت لو عرفتو من سنين قبل لاتزوجو لعمران ..
ومع هيك كنت اتعمد ضل بعيدة .. كنت خايفة كتير يغدر فيني ..
وبيوم.. كنت عم احكي معو ..
نديم: عهد .. انا رح حاكيكي بصراحة .. انا متزوج من سبع سنين
نصدمت وقت قلي هيك..
عهد: عم تحكي جد
نديم: سمعي لكفي.. مرتي ما بتجيب ولاد .. وصرلي سبع سنين عم عالج فيها لفقدنا الامل نحنا والدكاترة .. وانا عم دور ع بنت الحلال لاتزوجا .. ومرتي ما بدا ضرة لهيك طلبت الطلاق .. ورح طلقا..
و انت دخلتي لقلبي اول مرة شفتك.. حبيتك وتعلقت فيكي وصورتك ما بتفارقني .. انا بدي ياكي بالحلال
عهد: وانا بتمنى هالشي .. بس ما بعرف ردة فعل اهلي ..وكمان .. انت بتعرف انا كنت متزوجة من ابن عمي.. يعني الموضوع مخربط شوي
نديم: اي اكيد بعرف .. تركي هالشي علي .. انا بقنعن.. وبحاكي لابوكي .. وما بتوقع انو يعارض
عهد: خلص .. ماشي
فرحت كتير وقت صار هيك واطمنت بانو نديم بيحبني وما عم يلعب فيني .. وصرت اتعامل معو باريحية اكتر ...
عهد: نديم .. انت اول شخص بيدخل لقلبي .. وقلبي ما دق من قبلك .. انت يلي علمتني كيف الحب بيكون.. هالمشاعر يلي عم عيشا معك رجعت الحياة لقلبي
نديم: اااااخ .. لك بموت فيكي .. لك بعشقك
كنت اغلب الايام نام ع صوتو .. صار هو كل حياتي واحلا شي فيها ..
(الجزء الخامس)
بعد باسبوع من هالشي ..
ابي: عهد ... تعي لهون
اجيت لعندو وانا ناطرة شي مسبة منو ..
عهد: اي يابي
ابي: هههههههه والله وضحكتلك الدنيا مرة تانية يا عهد
اطالعت فيه وانا مستغربة ..
عهد: ليش ايمت ضحكتلي اول مرة
ابي: اي بلا علاك هلا .. نديم العامل .. طلبك ع سنة الله ورسوله
وقت قلي هيك كان قلبي رح يوقف من فرحتو .. بس ما حبيت بينلو لابي شي ..
امي: عم تحكي جد .. الحمد لله يا ربي
ابي: لك شبك جمدتي .. احكي شي
عهد: شو بدي قول يابي
ابي: لك شو رايك .. قلو يجيبن لاهلو
امي: هلا صرت بدك تاخد رايا .. لك هالشب بينشرا بالدهب .. طبعا موافقة
ابي: اي بس الشب كان متزوج .. وطلقا لمرتو من فترة قصيرة
امي: اي عادي .. وبنتنا كانت متزوجة وعندا ولاد .. وين المشكلة
عهد: يلي بدك ياه عملو يابي
حكيت هيك ودخلت ع غرفتي .. سجدت ع الارض وحمدت ربي وبكيت من قلبي
وتمت خطبتنا .. يلي كانت بس اسبوع واحد .. كنت طايرة من فرحتي .. بس لعنة عمران لاحقتني وما تركوني بحالي ...
امي: لك مين يلي عم يدق هيك ع الباب
كنت حاملتا لبنتي لصغيرة بحضني ...
عهد: ليكني رح افتح امي
امي،: تعي .. انا بفتح
فتحت امي الباب ..
امي: عمران.. شو في .. خير
كان الشر بعيونو لعمران ..
عمران: جاي لباركلا للست عهد
امي: اي الله يبارك فيك .. وهلا الله معك
حكت معو امي هيك ودفشت الباب لتسكرو .. بس عمران دفش الباب بعصبية ...
عمران: وين الله معي.. انا الي عندكن حق ورح اخدو
امي: لك ايا حق هاد .. بعد لهيك عن الباب
عمران: مو قبل ما اخدا لبنتي
انا وقت سمعتو عم يحكي هيك جسمي كلو بلش يرجف .. ومسكتا لبنتي باديي التنتين وضميتا وصرت ابكي..
عهد: ما رح اتركو ياخدك يا امي .. ما رح اتركو يا قلبي
وهني عم يحكو ع الباب وصواتن طالعة اجا ابي..
ابي: خير .. خير .. شو سيد عمران شايفك عنا .. منيح لساتك بتعرف باب بيتي
عمران: اي بعرفو منيح وقت بدي حقي
ابي: ايا حق ولا تشتوش .. ايا حق ولااااا
عمران: بنتي.. بدي بنتي
ابي: اي ما كان في داعي تعزب حالك وتجي .. انا كنت رح جيبا لعندك .. بتعرف اما رح تتزوج بعد اسبوع .. وما رح تفضالا
وقت قلو بابا هيك نزلت ع الارض وانا ماسكتا لبنتي وصرت صرخ..
عهد: لا ياااابي.. دخيلك يابي .. بنتي يااابي
ركضت امي ع صوتي لعندي..
امي: طولي بالك يامو .. طولي بالك
عهد: امي رح ياخذا لبنتي .. لك هالكلب شو بدو فيها .. لساتا صغيرة حرام
اجى ابي لعندي وسحبا لبنتي من حضني وهي عم تصرخ وتبكي ..
ابي: عطي ياها .. رح تتزوجي ويصير عندك بيت .. هو ابوها وهو يلي مجبور يربيها
عطاها لعمران .. يلي اخدا وراح بكل بساطة ..
قضيت طول النهار ع بكي .. لوقت دقلي نديم ..
عهد: الوو
نديم: كيفك
عهد: تمام
نديم: شبو صوتك .. ليش مخنوقة
وقت حكالي هيك ما قدرت امسك حالي وبكيت ..
نديم: لك شو صاير .. شبك .. عهد .. حبيبتي .. ردي علي
عهد: بنتي يا نديم .. بنتي .. اخدوها .. خلص انا ما عاد الي ولاد .. راحو كلن .. اخدن عمران اخدن
نديم: لا حول ولا قوة الا بالله .. طيب اهدي شوي
عهد: ماني قدرانة .. صوت بكاها لساتو بادني .. لك ليش هيك عم يعمل فيني .. ليش
نديم: عهد يا عمري .. طولي بالك .. انت رح تتزوجي وما رح تفضيلا .. واول ع اخر عمران رح ياخدا .. لا تدايقي يا قلبي .. وكلي امرك لربك .. هيك نصيبك..
بقيت طول الليل وانا احكي معو لنديم .. لغفيت وانا عم حاكيه .. وفقت الصبح ع صوت امي ..
امي: عهد ..لك ليش هيك ضاميتي للتلفون
فتحت عيوني .. وتذكرت انو كنت عم حاكيه لنديم ..
عهد: يا ربي .. لك نديم
امي: شبو نديم .. عم تحلمي فيه
مسكت التلفون وانا كتير متلبكة .. ودقيتلو ..
عهد: لك لا امي .. غفيت وانا عم حاكيه
امي: ههههههه .. اي بسيطة امي
عهد: صباح الخير
نديم: هلا حبي .. فقتي هههههه
عهد: اسفة كتير .. مو بئيدي والله غفيت
نديم: ولا يهمك .. صوت نفسك كان يجنن .. تمنيت كون حدك لشم ريحتك
وقت قلي هيك حسيت قلبي رح يوقف.. وتميت ساكتة..
نديم: شبك سكتي .. لساتك عم تخجلي مني .. ما بيمشي الحال هيك .. كلن يومين وبنتزوج هههههه
عهد: هههههههههه
نديم: جهزي حالك المسا .. رح امرق واخدك لنطلع شي مشوار سوا
عهد: اي ماشي
(الجزء السادس)
ووقت المسا مر نديم وطلعنا سوا ..
عهد: لوين رح نروح
نديم: ممممممممم .. اول شي رح نروح ناكل .. عازمك ع اكلة طيبة وبعدا الك مفاجاة
عهد: شو هي
نديم،: اي عم قلك مفاجاة .. كيف رح قولا ههههه
قربت منو وضربتو ع كتفو ...
عهد: ندييييم ... بربك حكيلي
نديم: ااااخ .. لك يا قلبو لنديم .. يا عيونو لنديم .. ومسكلي ادي التنتين .. سحبتن منو ..
عهد: لك شبك .. نحنا بالشارع
ضحك من كل قلبو ..
نديم: اي وشو فيها .. انت حلالي .. وانا حر فيكي
رحنا سوا ع المطعم وتعشينا سوا .. طول الوقت وهو عم يتغزل فيني وماسك ايدي .. عيشني ليلة من اجمل ليالي عمري .. وبعد ما خلصنا العشا..
نديم: يالا .. صار وقتا للمفاجاة
وقفت بسرعة وانا كتير متشجعة..
عهد: اي يالا
اخدني ع ستوديو للتصوير .. ودخلنا لجوا .. وقعدنا ننطر الصبية لتجي..
عهد: ههههههه.. لك شو هالمفاجاة
مسك ايدي نديم بكل حب وعشق..
نديم: بدي هالليلة تكون ذكرى حلوة بحياتنا .. ونضل نتذكرا ع طول .. بدي تنسي كلشي مريتي فيه بحياتك وتتذكري بس لحظاتك معي
عهد: من غير شي ما رح انسى كلشي معك .. يلي عشتو معك لاول مرة بحياتي بعيشو .. كنت اسمع فيه وما اعرفو .. انت احلا شي بحياتي
ومن غير وعي حطيت حالي بحضنو لاول مرة .. سمعت دقات قلبو .. وحسيت بحبو لالي .. حسيت بدفا طهارة الحب يلي بقلبو لالي ..
نديم: يخليلي ياكي يا رب
ونحنا ع هالحالة دخلت علينا الصبية .. قمت بسرعة من حضنو وانا متلبكة ..
الصبية: ههههههه.. لا تخجلي .. يخليكن لبعض يا رب
تصورنا .. وانبسطنا كتير .. ورجعت ع البيت وكملت السهرة معو ع التلفون ..
واجا يوم عرسي.. كلشي كنت احلم فيه لقيتو .. فستان العرس.. الحفلة .. الحنية من زوجي ومن بيت حمايي .. كلشي كان متل ما بدي واكتر .. عرسي كان بيجنن بكلشي فبه..
وقفنا سوا انا ونديم ..نحنا ماسكين ادين بعض .. الكل حوالينا عم يضحك ومبسوط فينا .. كنا كتير فرحانبن . ..بس قلبي كان واجعني ودمعتي نزلت بالغصب .. تمنيت لو نديم كان بحياتي قبلو لعمران .. ما كنت هلا عم اتوجع باللحظة يلي كان المفروض تكون اجمل لحظة بحياتي .. ما كانت دمعة الحزن نزلت قدام كل هالناس .. يا ترى هي الحياة هيك .. او انا يلي حظي من هالحياة هيك .. ليش ما في فرحة كاملة .. ليش دائما في غصة ملاحقتنا وما بتروح ..
نديم هو عوضي من رب العالمين .. بس للاسف الغصة ع ولادي لساتا بقلبي وعم تحرقني ..
حكيتلكن قصتي لفضفضلكن شوي ولقلكن تدعولي ربي يخفف وجع قلبي .. ويعوض علي ... ولاحكيلكن دايما في مع كل غصة فرحة .. قولي يا رب .. ربنا قدران يمحي هالغصة بلحظة ..
انتهت



بقلم امل احمد








   رد مع اقتباس

قديم 10-08-2018, 03:14 AM   رقم المشاركة : 2
معلومات العضو
^كــاتم أســرار^
المدير العام
 






^كــاتم أســرار^ غير متواجد حالياً

رد: يا عوضي من اللـه ـ بقلم امل احمد

شكرا لك والله يعطيك العافية


كاتم أسرار






   رد مع اقتباس

إضافة رد

مواقع النشر (المفضلة)


جديد مواضيع قسم منتدى القصص والروايات الاكثر شعبية
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 05:19 PM.


Powered by vBulletin® Version 3.8.8, Copyright ©2000 - 2019, Jelsoft Enterprises Ltd.
SEO by vBSEO 3.6.0 PL2
المقالات والمواد المنشورة في منتدى النرجس لاتُعبر بالضرورة عن رأي منتدى النرجس ويتحمل صاحب المشاركه كامل المسؤوليه عن اي مخالفه او انتهاك لحقوق الغير